“Ko‘ksaroy” qarorgohidagi 10 920 marta ovqatlanish 400 mln so‘mga baholandi
O‘zbekiston Prezidenti administratsiyasi Davlat rezidensiyalariga xizmat ko‘rsatish va tadbirlarni tashkil etish boshqarmasining “Ko‘ksaroy” qarorgohi 2020-yilning 23-mart kuni Akfa Dream World kompaniyasi bilan umumiy ovqatlanish xizmatlarini ko‘rsatish bo‘yicha shartnoma imzolagan. Davlat xaridlari portalida keltirilgan ma’lumotlarga ko‘ra, 40 kunga mo‘ljallangan shartnomaning umumiy qiymati 400 million so‘mga teng.
Shartnomaga muvofiq, Akfa Dream World kompaniyasi Toshkent viloyatining Qibray tumani “Do‘rmon” qishloq fuqarolar yig‘inida joylashgan rezidensiyada soat 9:00 dan 19:00 ga uch mahal ovqatlanishni tashkil etishi nazarda tutilgan. Shartnomada 40 kun davomida 92 kishiga nonushta (kuniga 2,76 million so‘m), 94 kishiga tushlik (kuniga 3,76 million so‘m) va 87 kishiga (kuniga 3,48 million so‘m) kechki ovqat tashkil etilishi ko‘rsatilgan (kuniga — jami 10 million so‘m). Bunda bir kishi uchun nonushta qiymati 30 ming so‘mg, tushlik va kechki ovqat 40 ming so‘mdan — kuniga 110 ming so‘mni tashkil etadi.
“Anhor.uz”ning tadbirkorlar reyestridagi ma’lumotlarga asoslanib yozishicha, Akfa Dream World motorli transport vositalarini ishlab chiqarish faoliyatini amalga oshiruvchi kompaniya. Uning ustav fondi 612,6 milliard so‘mga teng.Kompaniya ta’sischilari — Bahodir Abdullayev (8,6 foiz ulush), Asia Electron (12,92 foiz), Perfect Plast Profil (19,23 foiz), Wide Tent System (37,88 foiz), Techno Continental (19,23 foiz).
O‘z navbatida Techno Continental kompaniyasi ustav fondining 62,45 foizi Artel Electronics’ga tegishli. 37,5 foizi esa — Ilk Sabah Insaat Anonim Sirketi ixtiyorida.
Davlat xaridlari portaliga joylashtirilgan shartnomada Akfa Dream World kompaniyasi manzili Islom Karimov ko‘chasi 5-blok, 1—2-uy qilib ko‘rsatilgan. Ushbu manzilda Tashkent City joylashgan.
