Трамп «Антифа» ҳаракатини террорчилик ташкилоти деб тан олишга ваъда берди

Президент Дональд Трамп ўзининг Twitter’даги саҳифаси орқали АҚШ «Антифа» ҳаракатини террорчилик ташкилотлари рўйхатига киритишини маълум қилди.

Шунингдек, Америка президенти Миннеаполисдаги тартибсизликлар бўйича жавобгарликни «радикал сўлчи анархистлар» зиммасига юклади.

«Миннеаполисга ўтган кеча етиб келиб дарҳол ишга киришган Миллий гвардиямизни табриклайман. ‘Антифа’ бошчилигидаги анархистлар тезда тўхтатилди. Мер бу ишни биринчи кеча амалга оширганида, ҳеч қандай муаммо бўлмас эди», — деб ёзади Трамп.

«Антифа» — мақсадини фашизмга қарши кураш деб атаган халқаро ҳаракат бўлиб, у сўл радикал партиялар ва ташкилотларни, турли автоном гуруҳларни, шунингдек, неонатсизм ва ирқчиликка қарши курашувчи жамоат ташкилотларини бирлаштиради.

АҚШда тартибсизликлар ва полиция билан тўқнашувларга олиб келаётган норозилик намойиши 25 май куни Миннеаполисда полиция томонидан қўлга олинган 46 ёшли афро-америкалик Жорж Флойд вафот этганидан сўнг бошланди. Афро-америкаликнинг ўлими Black Liver Matter норозилик ҳаракатининг янада авж олишига туртки бўлган. Флойдни ўлдирган полициячига расман айблов эълон қилинган.