Китоб туманида коронавирус билан касалланганлик бўйича гумонланиш ҳолати қайд этилган эди. Гумонланувчи — 1963 йилда туғилган фуқаро Н.О. Китоб туманида яшаган. У 2020 йил 10 апрель куни Қозоғистонга кетган. 9 май куни Ўзбекистонга қайтиб келган ва Тошкент вилоятидаги Карантин марказига тиббий кузатувга олинган. 10 май куни Яккасарой туман тиббиёт бирлашмаси терапия бўлимига пневмония ташхиси билан ётқизилган.
«Ўтказилган диагностик таҳлиллардан сўнг беморда коронавирус инфекцияси аниқланмаган. Бундан аввал у жигар сиррози ташхиси билан даволанган», — дея хабар бермоқда Соғлиқни сақлаш вазирлиги.
У 29 май куни Китоб туман тиббиёт бирлашмаси шошилинч тиббий ёрдам бўлимига олиб келинган. Коронавирусга олинган таҳлил унда гумон натижани қайд этгани боис суртма намуналари 31 май куни ўрнатилган тартибга кўра махсус лабораторияга юборилган.
Бемор шу куни ўтказилган реанимацион муолажаларга қарамай вафот этган. Коронавирусга гумонланган марҳум билан мулоқотда бўлган барча фуқаролар эҳтиёт чораси сифатида стационар ва уй карантинига олинган. Китоб туман ҳудуди тўлиқ карантинга ёпилган.
«31 май куни юборилган суртма намуналарини такрор текширув натижаларига кўра, марҳумда коронавирус аниқланмаган. Демак, бир ой ичида ўтказилган иккинчи диагностик таҳлил ҳам бемор коронавирусга чалинмаганлигини кўрсатган», — дейилади ССВ ахборотида.
Соғлиқни сақлаш вазирлигидан қўшимча қилишларича, бемор ёндош касалликлар туфайли вафот этган. «Шундай бўлса-да, қатъий санитария қоидаларига кўра, карантинга олинган фуқаролар маълум муддат тиббий кузатувда бўлади», — дейилади вазирлик ахборотида.
