Бухорода ИИБ ходимларининг хатоси билан 11 йил умрини қамоқда ўтказган 53 ёшли фуқаро айбсиз деб топилди

Бухоро вилоятида ИИБ ходимлари хатоси билан 11 йил умрини қамоқда ўтказган 53 ёшли фуқаро Ихтиёр Эшмуродов айбсиз деб топилиб, қамоқдан озод этилди. Бу ҳақда «Дарё»га Жиноят ишлари бўйича Бухоро вилоят суди раиси ўринбосари Абдуманноп Шайдоев маълум қилди.

Таъкидланишича, Олий суд ҳайъатининг ажрими билан маҳкумга нисбатан чиқарилган Жиноят ишлари бўйича Бухоро вилоят суди апелляция инстанциясининг 2009 йил 3 сентябрдаги ажрими 28 май куни бекор қилинган.

Маълумот берилишича, 2009 йил 42 ёшли Ихтиёр Эшмуродов ҳамқишлоғининг 7 минг доллар пулини қўлга киритиш мақсадида унинг яшаш уйи ётоқхонасига бостириб кириб, ҳамқишлоғи ва унинг 9 ёшли набирасига ҳужум қилганликда айбланган.

Жиноят ишлари бўйича Жондор туман судининг 2009 йилдаги ҳукмига кўра, Ихтиёр Эшмуродов Жиноят кодексининг 164-моддаси (Босқинчилик), 25-моддаси (Жиноятга тайёргарлик кўриш ва жиноят содир этишга суиқасд қилиш), 97-моддаси (Қасддан одам ўлдириш) билан айбланиб, 17 йилга озодликдан маҳрум қилинган.

У жазо муддатининг 11 йилини умумий тартибли колонияларида ўтаган. Ўтган йиллар давомида ўзининг айбсизлигини айтиб, Жиноят ишлари бўйича Бухоро вилоят судига апелляция шикояти киритган ва оқлов ажримини сўраган.

«Қонунчиликка кўра, суд ўша пайт жиноят юз берганлигини, унинг содир этилишида ким айбдорлигини, шунингдек, у билан боғлиқ барча ҳолатларни аниқлаши ва иш бўйича исботланиши лозим бўлган барча ҳолатларни синчковлик билан холисона ўрганиши керак эди. Бироқ фуқаро Ихтиёр Эшмуродов ишида қонун талабларига риоя қилинмаган», — дейди Бухоро вилоят суди раиси ўринбосари Абдуманноп Шайдоев.

Апелляция инстанциясининг видеоконференцалоқа режимида ўтказилган суд процессида сўроқ қилинган Ихтиёр Эшмуродов жабрланувчи Т.Ю ва унинг оила аъзоларини танишини, бироқ улар билан орасида ҳеч қачон келишмовчиликлар бўлмаганини, 2009 йилнинг 29 январь куни ҳамқишлоғининг уйида содир этилган босқинчилик ҳақида тергов ҳаракатлари жараёнида билгани ҳақида кўрсатма берган.

«Бундай ёвуз жиноятни мен содир этмагандим. ИИБ ходимлари мендан айбимга иқрор бўлишни талаб қилди, турли жисмоний ва руҳий тазйиқлар ўтказишди, асоссиз равишда мени маъмурий қамоққа олишди. Айбимга иқрорлик билдирмасам, гиёҳвандлик воситаси ташлаб бўлса ҳам мени қамаш билан қўрқитишди. Уч сутка давомида қийноқларга солиб, бармоқ изларимни олишди. Аммо жиноятни содир этмаганман, менга нисбатан адолатли қарор қабул қилишингизни сўрайман», — деди Ихтиёр Эшмуродов видеоконференцалоқа режимидаги судда.

Ўрганилган иш ҳужжатларига кўра, маҳкум 2009 йилнинг 29 январь куни ўз уйидан юз метр нарида бўлган қўшниси Ислом Боқиевникига бориб, ундан DVD диск олиб келган.

«Ўша пайт судда жабрланувчи сифатида иштирок этган фуқаро ва бизнинг уйимиз орасидаги масофа уч километр чиқади. Эрим ҳатто унинг уйида пул борлигидан ҳам хабари бўлмаган», — дейди Ихтиёр Эшмуродовнинг турмуш ўртоғи Замира Эшмуродова.

Шунингдек, жабрланувчи Т.Ю. ҳам тергов жараёнларида уйига бостириб кирган шахснинг айнан судланувчи Ихтиёр Эшмуродов бўлгани ёки бўлмагани ҳақида турлича кўрсатмалар берган. Кўрсатмаларини бир неча маротаба ўзгартирган.

Т.Ю. хонадонида содир бўлган ҳолат бўйича ИИБ ходимлари томонидан тузилган баённомада холислар сифатида имзо қўйган Ҳамро Ҳамроев ҳамда Зоҳид Бобоевлар имзо ўзларига тегишли эмаслигини маълум қилган.

Мазкур ҳолатларни ўрганиб чиққан Жиноят ишлари бўйича Бухоро вилоят суди апелляция инстанциясига кўра, фуқаро Ихтиёр Эшмуродов ишини Жиноят-процессуал кодексининг 83-моддаси 2-ва 3-бандлари (Қилмишида жиноят таркиби бўлмаганлиги ва содир этилган жиноятга дахли йўқлиги)га асосан тугатган. У айбсиз деб топилиб, оқланган ва жазони ўташ колониясидан озод этилган.

Унга Жиноят-процессуал кодексига кўра, жиноий таъқиб натижасида етказилган мулкий, маънавий ва бошқа зиён оқибатларини бартараф қилиш ҳуқуқига эгалиги билдирилган.