Самарқанд вилоятида ЙПХ инспекторининг хизмат вазифасини бажаришига тўсқинлик қилиб, унга қўл кўтарган ҳарбий хизматчининг турмуш ўртоғига нисбатан жиноят иши қўзғатилди. Бу ҳақда «Дарё» мухбири хабар берди.
Аниқланишича, Тошкент вилоятининг Чирчиқ шаҳрида туғилган фуқаро С.Р. 2019 йилнинг 28 сентябрь куни соат тахминан 16:30 да турмуш ўртоғи, ҳарбий хизмат сержанти Ф.Р. бошқарувидаги автомобиль ҳужжатларини талаб қилган ЙПХ инспектори ишига халал бериб, унга қўл кўтарган.
Маълум бўлишича, Самарқанд вилояти ИИБ ЙҲХБ ЙПХБ 1-отряди ЙПХ катта инспектори, кичик сержант М.Қўрғонов Самарқанд тумани «Қўштамғали» маҳалласи ҳудудидан ўтувчи М-39 автомобиль йўлининг 1085-километрида тўхташ ва тўхтаб туриш қоидаларини бузган Spark ҳайдовчисининг қоидабузарлиги учун маъмурий баённома расмийлаштирган.
Бу пайтда савдо дўконидан қайтган ҳайдовчининг турмуш ўртоғи С.Р. эса ЙПХ инспекторига қаршилик кўрсатиб, унинг хизмат кийимидан тортган. Эгнидаги кўйлагининг чап елка қисмидаги погони, бўйинбоғи ва кўкрак нишонини тортиб олиб, ходимни хизмат вазифасини бажаришдан воз кечишга мажбур қилган. Маъмурий ҳуқуқбузарлик учун расмийлаштирилаётган баённомани эса йиртиб, яроқсиз ҳолга келтирган.
Жиноят ишлари бўйича Самарқанд туман суди судьяси Даврон Нуралиевнинг «Дарё»га маълум қилишича С.Р. Жиноят кодексининг 219-моддаси 2-қисми (Ҳокимият вакилига ёки фуқаровий бурчини бажараётган шахсга қаршилик кўрсатиш) ва 227-моддаси 1-қисми (Ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш) билан айбдор деб топилиб, унга нисбатан жиноят иши қўзғатилган.
Карантин сабаб суд иши вақтинча тўхтатилган.
Изоҳ (0)