Профессионал футбол лигаси директори вазифасини бажарувчи Диёр Имомхўжаев 5 июндан футбол мусобақаларини бошлашга рухсат бериш ҳақидаги қарорга шарҳ берди.
Мутасаддининг айтишича, 5 июндан футбол учрашувларига рухсат берилгани билан Суперлига баҳслари айнан ўша куни бошланмайди.
«Санитария-эпидемиологик осойишталик агентлиги хабарида, футбол учрашувларини 5 июндан бошлаб давом эттириш мумкинлиги кўрсатилган. Бироқ бу Суперлига учрашувларини айнан шу санадан бошлаш шарт эканини билдирмайди. Биз футболчилар ўз формасини тиклаб олиши, мураббийлар мавсум давомига тайёргарлик кўриб олиши учун вақт берамиз. Бу жароҳатланиш ҳолатлари нисбатан камроқ бўлиши ҳамда барча масалалар пухта режа ва тайёргарлик билан амалга оширилишига имкон беради», — дейди Имомхўжаев.
«Дарё» мухбири ушбу масалага ойдинлик киритиш учун Диёр Имомхўжаев билан боғланди. Унинг сўзларига кўра, мавсумни қайта бошлаб олишга тайёргарлик кўриш учун клубларга камида икки ҳафта вақт берилади. Аввалроқ Имомхўжаев футбол ўйинларига рухсат тегиши билан икки ҳафта тайёргарлик учун тақдим этилишини бир неча бор таъкидлаганди.
Шу тариқа Суперлига баҳслари, тахминан, 12 ва 13 июнь саналарида қайта бошланади.
Маълумот учун, 2020 йилги Суперлига баҳслари март ойи ўрталарида 3-турга келиб тўхтаб қолганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)