АҚШнинг Миннеаполис шаҳри (Миннесота штати) мэри Жейкоб Фрей полиция томонидан қўлга олинган афро-америкалик Жорж Флойднинг ўлими туфайли аҳолининг норозилик ҳаракатлари авж олган пайтда шаҳарда фавқулодда ҳолат эълон қилди. Фармон шаҳар мэрияси сайтига жойлаштирилган.
Ҳужжатда айтилишича, фавқулодда ҳолат режимининг жорий этилиши ҳукуматга фуқаролар хавфсизлигини таъминлашда қўшимча имконият беради. Шаҳар мэрияси Миннесота штатидаги қўшни шаҳарлар ва федерал ҳукуматдан ёрдам сўраши мумкин.
Фавқулодда ҳолат 72 соатга жорий этилади, аммо шаҳар кенгаши уни муддатидан аввал бекор қилиши ҳам мумкин.
Миннеаполисда норозилик ҳаракати 2 суткадан бери давом этмоқда. У 46 ёшли афро-америкалик Жорж Флойднинг ўлимидан сўнг бошланди. Полициянинг билдиришича, Флойд дўконда сохта ҳужжатлардан фойдаланган. Уни қўлга олмоқчи бўлишганида қаршилик кўрсатган. Шундан сўнг полиция уни тутиб, ерга ётқизган ва тиззаси билан бўйнини босган.
25 май куни воқеа акс этган видео ижтимоий тармоқларда тарқалган. Уни гувоҳлардан бири тасвирга олган. Видеода жабрланувчи ҳаво этишмаётганини айтган, бироқ полициячи унга эътибор қилмаган. Кейинроқ у шаҳар касалхонасида вафот этган.
https://twitter.com/ProBlacktivist/status/1265324197846437892
27 май куни юзлаб одамлар полиция идораси олдида норозилик намойишига чиққан. Кейинчалик уларнинг сони бир неча минг кишига ошган. Норозилик намойиши давомида полиция билан тўқнашув содир бўлган, бир неча корхоналар, шу жумладан, автомобиль эҳтиёт қисмлари сотиладиган дўкон ёниб кетган. Шунингдек, намойишлар вақтида бир киши ҳалок бўлган.
Ижтимоий тармоқларда жойлаштирилган видеолардан ҳам унинг қанчалик жиддий тус олганини кўриш мумкин.
https://twitter.com/cherjennie/status/1265898848255344640
Миннесота штати губернатори Тим Уолз тартибсизликни бартараф этиш учун АҚШ Миллий гвардияси аскарларини жалб этиш тўғридаги фармонни имзолаган.
Президент Дональд Трамп Флойд ўлими юзасидан имкон қадар пухта тергов ўтказишни топширди.
Изоҳ (0)