27 май куни вояга етмаган икки бола ЙТҲ қурбони бўлди. Бу ҳақда Тергов департаменти ва ЙҲХББ хабар бермоқда.
Биринчи ЙТҲ Қашқадарё вилояти Китоб тумани Искана қишлоғида соат 09:00 да содир бўлган. 22 ёшли Н.Т. қишлоқнинг ички йўлидан ҳаракатланиб кетаётган вақтида автомашинанинг олд томонида ўйнаб юрган 2 ёшли С.М.ни уриб юбориб, йўл-транспорт ҳодисаси содир қилган.
Оқибатда вояга етмаган С.М. тан жароҳати олиб, ҳодиса жойда вафот этган.
Мазкур ҳолат юзасидан Китоб тумани ИИБ ҳузуридаги Тергов бўлинмаси томонидан Жиноят кодексининг 266-моддаси 2-қисми (Одам ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, дастлабки тергов ҳаракатлари олиб борилмоқда. Ушбу модда бўйича айбдор деб топилган шахс 7 йилгача озодликдан маҳрум этилиши мумкин.
Иккинчи ҳодиса соат 18:50 ларда Наманган вилояти Наманган шаҳри «Янги аср» МФЙ ҳудудидан ўтган 4Р-112 Фарғона ҳалқа йўлининг 77-километрида юз берган. 1982 йилда туғилган Х.Ж. бошқарувидаги «ВАЗ-2106» («Жигули») тўхташга улгурмай, йўлнинг белгиланмаган жойидан кесиб ўтаётган пиёда 2015 йилда туғилган М.У.ни уриб юборган. Ушбу йўналишда ҳаракатланиб келаётган ҳайдовчи 1981 йилда туғилган К.Қ. бошқарувидаги Damas оралиқ масофани сақламаганлиги оқибатида «Жигули»нинг орқа томонига келиб урилган.
«Жигули» уриб юборган 5 ёшли ўғил бола оғир тан жароҳати олиб шифохонада вафот этган.
Мазкур ЙТҲ юзасидан Наманган шаҳар ИИО ва ФМБ ТБ томонидан суриштирув ишлари олиб борилмоқда.
ЙҲХББ барча ҳайдовчилардан йўлларда пиёдаларга эътиборли бўлишни, ота-оналардан ёш болаларни қаровсиз қолдирмасликни сўраб қолди.
Аввалроқ Тошкент ва Фарғона вилоятларида юк машиналари эшак араваларни уриб юборгани, иккала ЙТҲ оқибатида 3 киши вафот этгани хабар қилинганди.
Изоҳ (0)