Самарқанд вилоятининг Булунғур туманида 27 май, чоршанба куни одам ўлими билан якунланган йўл-транспорт ҳодисаси юз берди. Бу ҳақда ЙҲХББ хабар бермоқда.
Ҳодиса соат 01:30 ларда «Улуғбек» маҳалласи ҳудудидан ўтувчи М-39 автомобиль йўлининг 1058-километрида содир бўлган. 1980 йилда туғилган Х.Т. исмли эркак бошқарувидаги Lacetti тезлигини меъёридан оширган ҳолда Самарқанд—Тошкент йўналиши бўйлаб кетаётганда ўзи билан бир йўналишда олдинда ҳаракатланиб кетаётган 1984 йилда туғилган М.Т. исмли эркак бошқарувидаги Damas’нинг орқа ўнг ён томонидан урган. Сўнг Lacetti автомобили ағдарилган.
ЙТҲ оқибатида Lacetti йўловчиси 1984 йилда туғилган Х.К. исмли эркак оғир тан жароҳати олиб шифохонада вафот этган.
Мазкур ЙТҲ юзасидан Булунғур тумани ИИБ ҳузуридаги Тергов бўлими томонидан Жиноят кодексининг 266-моддаси 2-қисми (Одам ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, 24 май куни Самарқанд вилоятининг Иштихон туманида Matiz каналга тушиб кетиши оқибатида машина йўловчиси вафот этиб, унинг жасади каналда оқиб кетганди. 26 май куни Тошкентда Nexia-2 ва Tico тўқнашуви оқибатида ҳам йўловчи вафот этганди.
Изоҳ (0)