Toshkent va Farg‘ona viloyatlarida yuk mashinalari eshak aravalarni urib yubordi. 3 kishi halok bo‘ldi

Toshkent va Farg‘ona viloyatlarida 26-may kuni deyarli bir vaqtda yuk mashinalari eshak aravalarni urib yuborgan. Bu haqda Tergov departamenti xabar bermoqda.

Birinchi hodisa soat 06:00 da Toshkent viloyatining Yangiyo‘l tumani hududida sodir bo‘lgan. 28 yoshli Q.J. HOWO yuk mashinasini M-39 xalqaro avtomobil yo‘lining 846-kilometrida boshqarib ketayotganida o‘zi bilan bir yo‘nalishda yo‘lning o‘ng qismida harakatlanayotgan eshak aravani avtomobilning old qismi bilan urib yuborgan. Hodisa oqibatida eshak aravani boshqarib ketayotgan 24 yoshli X.V. va uning turmush o‘rtog‘i 20 yoshli O.V.lar olgan tan jarohatlari bilan tibbiyot birlashmasining jonlantirish bo‘limiga yotqizilgan. Ko‘rsatilgan tibbiy muolajalarga qaramay O.V. shifoxonada vafot etgan.

Shundan so‘ng Yangiyo‘l tumani IIB huzuridagi Tergov bo‘limi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan.

27-may kuni X.V. ham shifoxonada jon bergach, jinoyat ishi JKning 266-moddasi 3-qismi “a” bandiga (odamlar o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) qayta malakalangan. Hozirda tergov harakatlari olib borilmoqda. Haydovchi aybdor deb topilsa, 10 yilgacha ozodlikdan mahrum etilishi mumkin.

Ikkinchi YTH soat 06:30 larda Farg‘ona viloyati Buvayda tumani Yangiqadam qishlog‘i hududidan o‘tgan O‘sh–Toshkent A-373 avtomobil yo‘lining 215-kilometrida sodir bo‘lgan. 28 yoshli M.G‘.ning boshqaruvidagi MAN yuk avtomashinasi Toshkent shahri yo‘nalishida harakatlanib ketayotganida qatnov qismining o‘ng chetida eshak aravada borayotgan 46 yoshli J.E. va uning voyaga yetmagan farzandi 13 yoshli Z.J.larni urib yuborib, yo‘l-transport hodisasini sodir etgan.

Mazkur YTH oqibatida eshak aravada bo‘lgan J.E. hodisa joyida vafot etgan, Z.J. esa turli ko‘rinishdagi tan jarohatlari bilan tuman tibbiyot birlashmasiga yotqizilgan.

Holat yuzasidan Buvayda tumani IIB huzuridagi Tergov bo‘linmasi tomonidan Jinoyat kodeksining 266-moddasi 2-qismi (odam o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda. Haydovchi aybdor deb topilsa, 7 yilgacha ozodlikdan mahrum etilishi mumkin.

YHXBB va Toshkent viloyati IIBB YHXBdan ma’lum qilishlaricha, har ikkala yo‘l-transport hodisasida eshaklar omon qolgan.