Ўзбекистонда Инқирозга қарши курашиш жамғармасининг маблағлари қаерга сарфланаётгани тўғрисида маълумот берилди

Молия вазирлиги Инқирозга қарши курашиш жамғармасининг 27 майгача бўлган харажатлари юзасидан маълумот берди.

Жамғарманинг 7,44 триллион сўм миқдоридаги даромадлар ҳажмининг 7,32 триллиони халқаро молия институтларининг имтиёзли кредитлари ҳамда 123,5 миллиарди давлат бюджети ҳисобидан шакллантирилган. Шу билан бирга, халқаро молия институтларининг маблағлари жалб қилингунга қадар давлат бюджетидан йўналтирилган 475 миллиард сўм маблағ давлат бюджети даромадларига қайта тикланган.

Жамғарма маблағларининг 3,306 миллиард сўми ишлатилган бўлиб, уларнинг аксарияти (1,4 триллион сўм) иқтисодиётни қўллаб-қувватлашга йўналтирилган. Хусусан, субсидия маблағлари сифатида 500 миллиард сўм «Иссиқлик электр станциялари» АЖ корхоналарига, «Ўзбекнефтгаз» АЖга — 401 миллиард сўм ажратилган бўлса, Uzbekistan Airports’га — 101 миллиард сўм, Uzbekistan Airways’га — 406 миллиард, «Биринчи резинотехника заводи»га — 40 миллиард сўм миқдорида ссуда маблағлари ажратилган.

Эътиборли жиҳати, «Gazeta.uz»нинг маълум қилишича, «Биринчи резинотехника заводи» (БРЗ) 2014 йилда «Ўзкимёсаноат» буюртмасига биноан Хитойнинг Poly Technologies компанияси томонидан 183,96 миллион доллар эвазига қурилган.

«Ангрен» эркин иқтисодий зонасида жойлашган БРЗ конвеер ленталари, қишлоқ хўжалиги ва автомобиль шиналарини, шунингдек, UzAuto Motors томонидан ишлаб чиқарилган автомобиллар учун ҳам шиналар ишлаб чиқариш билан шуғулланади. Шунингдек, завод 2020 йилнинг 1 октябрига қадар бир қатор имтиёзларга эга ҳисобланади.

Завод муассиси «Ўзкимёсаноат» ҳисобланади, директори эса Тошкент вилояти собиқ ҳокими ва собиқ бош вазир ўринбосари Ғуломжон Иброҳимов. Бироқ муассислар таркиби тез орада ўзгариши керак. 2019 йилнинг 26 ноябрида Россиянинг «Татнефть» компанияси «Ўзкимёсаноат» ва БРЗ билан завод базасида қўшма корхона яратиш бўйича битим имзолаган. Қўшма корхонанинг 51 фоиз улуши Россия томонига, 49 фоизи — «Ўзкимёсаноат»га тегишли бўлади.

Битим томонлар бир қатор шартларни келишиб олгач амалга ошиши, БРЗ эса «Татнефть» шина бизнеси (KAMA TYRES) билан бирлашиши маълум қилинганди.

Республика санитария-эпидемиологик осойишталик агентлигига 573 миллиард сўм ажратилган. Маблағларнинг 270 миллиарди тест тизимлари, реактив ва ҳимоя воситаларини сотиб олишга йўналтирилган бўлса, 11 миллиард сўм махсус транспорт воситаларини харид қилишга сарфланган. Шунингдек, карантинга олинган фуқароларни дори-дармонлар билан таъминлашга — 3 миллиард сўм, карантин тадбирларига жалб этилган, коронавирус инфекциясига чалинган беморларни даволаётган тиббиёт ва бошқа ходимларга махсус қўшимча ва рағбатлантириш тўловлари учун — 12 миллиард сўм йўналтирилган.

Ажратилган маблағларнинг катта қисми — 277 миллиард сўм ҳудудий марказларга, жумладан, фуқароларни карантинда сақлаётган муассасалар ходимларининг иш ҳақи, озиқ-овқат, гигиена, товарлар ва бошқа харажатларига, тадбирга жалб этилган тиббиёт ходимларининг устамалари учун (250 миллиард сўм), жамоат жойларини дезинфекция қилишга — 18 миллиард, эпидемик ҳолат билан курашиш бўйича бошқа тадбирларга 9 миллиард сўм ажратилган.

Шифохоналар ва карантин мажмуаларини қуриш ва жиҳозлашга 487 миллиард сўм ажратилди. Маблағларнинг 286 миллиарди 10 минг ўринли махсус шифохоналар қуриш учун, 182 миллиард сўм 20 минг ўринли аҳолини вақтинча карантинда сақлаш мажмуасини қуришга йўналтирилган бўлса, диагностика лабораторияси мажмуасини реконструкция қилишга — 10 миллиард сўм, тиббий жиҳоз ва инвентарлар, дори-дармон, дезинфекция ишлари ва тиббий буюмлар учун — 9 миллиард сўм йўналтирилди.

Ижтимоий соҳага ажратилган маблағлар 294 миллиард сўмни ташкил этмоқда. Улар ўз ичига кам таъминланган оилаларда яшовчи хотин-қизларни қўллаб-қувватлаш (60 миллиард сўм), банд бўлмаган фуқароларни вақтинчалик ишларга жалб қилиш (100 миллиард сўм), ижтимоий нафақалар (70 миллиард сўм), ишсиз, кам таъминланган оилаларга шахсий томорқаларини ривожлантириш (50 миллиард сўм) каби соҳаларни қамраб олади.

Шунингдек, «Тошкент метрополитени» ва «Тошшаҳартрансхизмат» ходимларига тўловлари учун 11 миллиард сўм, «Ўзавтотранссервис» ва «Тошшаҳартрансхизмат» транспорт харажатларини қоплашга 2 миллиард сўм, Мудофаа вазирлигига гуманитар ёрдамни олиб келиш билан боғлиқ харажатлар учун 1 миллиард сўм ажратилган.

Сув таъминоти ва ирригация тадбирлари билан боғлиқ харажатларга 504 миллиард сўм миқдорида маблағ йўналтирилган. Улар орасида ирригация объектларини қуриш ва реконструкция қилишга 246 миллиард сўм, Жиззах вилоятида Зафаробод туманидаги «Иншоот» қурилиши объектига 57 миллиард сўм, уй-жой коммунал хизмат кўрсатиш вазирлигига ичимлик сув таъминоти ва оқова сув чиқариш тизимларини қуришга 39 миллиард сўм, сув хўжалиги вазирлигига — Жиззах вилоятидаги ирригация тадбирлари учун 14 миллиард сўм, Оролни қутқариш жамғармасига 10 миллиард, 22 минг ўринли аҳолини вақтинчалик карантинда сақлаш мажмуаси сув таъминоти учун 16 миллиард, 10 минг ўринли махсус шифохоналар сув таъминоти учун 8 миллиард сўм ажратилган.

Бундан ташқари, «Ҳудудий сув таъминоти» МЧЖга 61 миллиард сўм, Давлат экология қўмитасига 53 миллиард сўм ссуда ажратилган.