27 май куни Андижон вилоят ҳокими Шуҳрат Абдураҳмонов иштирокида ўтказилган йиғилишда Марҳамат туманига янги ҳоким тайинланди. Бу ҳақда вилояти ҳокимлиги ахборот хизмати хабар берди.
Марҳамат тумани фаоллари билан ўтказилган йиғилишда кун тартибида белгиланган масалалар кўриб чиқилди. Шавкат Мирзиёев Андижонга ташрифи давомида Марҳамат тумани ҳокими Шуҳрат Қамчиев эгаллаб турган лавозимидан озод этилган эди.
Ҳозирги кунга қадар Ўзбекистон Президенти Администрацияси маҳаллий давлат ҳокимияти органлари билан ишлаш шўъбаси бош инспектори лавозимида ишлаб келаётган Бобур Йўлдошев Марҳамат тумани ҳокими этиб тайинланди.Бобур Йўлдошев 1986 йил 22 январь куни Андижон вилояти Андижон шаҳрида туғилган. 2008 йилда Андижон муҳандислик иқтисодиёт институтини тамомлаган.
Бобур Йўлдошев Меҳнат фаолиятини 2005—2006 йилларда Андижон шаҳар статистика бўлими иқтисодчиси сифатида бошлаган. 2006—2009 йилларда Андижон вилоят статистика бошқармасида турли лавозимларда, 2009—2010 йилларда Андижон вилояти ҳокимлиги иқтисодиёт бош бошқармаси саноат, коммуникация ва ахборот технологияларини ривожлантириш бўлими бошлиғи, вилоят ҳокимлиги ахборот-таҳлил гуруҳи раҳбари, 2018—2019 йилларда Ўзбекистон Президенти Администрацияси маҳаллий давлат ҳокимияти органлари билан ишлаш шўъбаси етакчи инспектори лавозимларида фаолият кўрсатган. 2019 йилдан ҳозирга қадар Президент Администрациясининг маҳаллий давлат ҳокимияти органлари билан ишлаш шўъбаси бош инспектори лавозимида фаолият юритиб келган.
Изоҳ (0)