АҚШ президентлигига номзод Жо Байден амалдаги президент Дональд Трампни аҳмоқ деб атади. Байденнинг фикрича, у коронавирус пандемияси фонида «сохта мардлигини» намойиш қилмоқда, деб хабар беради «Коммерсантъ».
Аввалроқ президент Хотира куни муносабати билан ўтказилган тадбирга ҳимоя ниқобисиз келган, Жо Байденда эса ниқоб ва кўзойнакда бўлган. Кейинроқ Дональд Трамп Twitter’даги саҳифасида Байденнинг ниқобдаги суратини ретвит қилган. CNN телеканали бошловчиси эса президент ниқоб тақиш кучсизлик белгиси эканлигини кўрсатиб қўйиб, ўзининг сиёсий рақибини «камситишга» уринганини тахмин қилганди.
«У — аҳмоқ, мутлақо аҳмоқ, чунки шунақа гапларни гапирмоқда», — дейди Байден CNN’га берган интервьюсида. Унинг айтишича, етакчи мутахассислар омма ичида бўлганда ниқоб тақиш кераклигини таъкидламоқда. Жо Байденнинг сўзларига кўра, Дональд Трамп «сохта мардлигини» намойиш этиб, ёмон намуна бўлмоқда, «одамлар эса бунинг учун ҳаёти билан тўлашга мажбур бўляпти».
Эслатиб ўтамиз, 77 ёшли Жозеф Байден АҚШ президентлигига Демократлар партиясидан ягона номзод саналади. Унинг номзоди 2020 йил август ойида партия съездида расман илгари сурилиши режалаштирилган.
Изоҳ (0)