Россия Олий суди Чувашистон собиқ раҳбари Михаил Игнатьевнинг мамлакат президенти Владимир Путинга нисбатан даъвосини кўриб чиқиш санасини 30 июнь кунига белгилади.
Игнатьев ўзининг минтақа раҳбарлигидан истеъфога чиқарилиши тўғрисидаги президент қароридан норози эканлигини билдирган.
Путин уни 2020 йилнинг январида ишдан бўшатган эди. Михаил Игнатьев 2010 йил июлдан бери Чувашистонга раҳбарлик қилиб келаётганди.
Игнатьев январь ойи ўрталарида, матбуотдаги буюртма материаллар ҳақида гапираркан, журналист ва блогерларнинг «суробини тўғрилаб қўйиш» кераклигини таъкидлаган эди. 23 январда эса янги ўт ўчириш машиналарининг калитларини топшириш маросимида ФВВ ходимини калитни олиш учун бир неча бор сакрашга мажбур қилган эди.
Шундан сўнг, Игнатьев 28 январда Россияда ҳукмрон «Единая Россия» партияси сафидан чиқарилгани маълум бўлди. Партия бош кенгаши котиби Андрей Турчак «Единая Россия» аъзолари Игнатьев ортиқ Чувашистонга раҳбарлик қилмаслиги керак, деган фикрда эканлигини маълум қилган эди.
Изоҳ (0)