Хитойда сўнгги бир суткада коронавирус билан касалланиш бўйича 1 та ҳамда касаллик белгисиз ўтаётган 28 та ҳолат қайд этилди. Беморлардан ҳеч бири вафот этмади, деб хабар бермоқда «РИА Новости» Хитой Соғлиқни сақлаш миллий комиссиясига таяниб.
Янги касалланиш ҳолати четдан юқтирилган бўлиб, Шанхайда қайд этилган.
Эпидемия бошланганидан буён Хитойда 82 993 кишини коронавирусга чалингани қайд этилди. Беморларнинг 78 280 нафари соғайди, 4 634 нафари вафот этди. Касалхоналарда 79 нафар бемор даволанмоқда.
Шунингдек, сутка давомида 28 киши инфекцияни белгиларсиз ташувчи сифатида қайд этилган. Шундай кишиларнинг яна 404 нафари шифокорлар назоратида бўлиб турибди.
22 май куни мамлакатда эпидемия бошланганидан буён биринчи бор коронавирусга чалиниш бўйича янги ҳолат қайд этилмаганди. Эртаси куни эса 3 кишида касаллик аниқланган.
Жанубий Кореяда эса апрель ойидан буён биринчи марта сутка давомида 40 киши коронавирусга чалингани қайд этилди. Касалланганларнинг умумий сони 11 265 нафарга етди, деб хабар бермоқда «РИА Новости» мамлакат Соғлиқни сақлаш вазирлиги ҳузуридаги Касалликлар назорати ва профилактикаси маркази (KCDC) маълумотларига таяниб.
Апрель ойидан бошлаб кунлик касалланишлар сони 40 нафардан 10-20 кишигача, 6 май куни эса бу кўрсаткич 2 кишигача тушганди.
Қайд этилишича, янги касалланиш ҳолатларининг 37 таси Сеулнинг одам гавжум бўлган Итхэвон ҳудудидаги клуб ва барларида COVID-19 тарқалиши ҳолати билан боғлиқ. Қолган 3 таси эса четдан юқтирилган.
Мамлакатда чет элдан келганларнинг барчаси икки ҳафталик карантинда бўлади. 11 майдан бошлаб эса улар қайси мамлакатдан келгани ва касаллик аломатлари бор-йўқлигидан қатъи назар, мажбурий коронавирус текширувидан ўтказилади.
Шунингдек, сўнгги суткада 20 киши касалликдан тузалиб, соғайганларнинг умумий сони 10 295 нафарга етган. Вирус қурбонлари сони эса 269 кишини ташкил қилмоқда.
Хабарда айтилишича, коронавирусга чалинганларнинг 30 фоизида касаллик аломатларсиз кечаётгани унинг сездирмасдан тарқалишига олиб келмоқда.
Изоҳ (0)