Россиялик миллиардерлар пандемия даврида 62 млрд долларга бойиган

Коронавирус пандемияси даврида Россия миллиардерларининг умумий бойлиги 62 миллиард АҚШ долларига ўсган. Бу ҳақда Forbes хабар қилган.

Журнал ўз онлайн ҳисоблагичидаги ҳозирги кўрсаткичларни 18 мартдаги рақамлар билан солиштирган (ушбу сана Forbes’нинг 2020 йил учун рейтингидаги бизнесменлар бойлигининг охирги ҳолатини ҳисоб-китоб қилиш учун танланган). Икки ойдан бир оз кам давр оралиғида Россия миллиардерларининг умумий бойлиги 392 миллиарддан 454 миллиард долларгача ўсган.

Беш нафар энг бой россиялик миллиардерларнинг даромади 22,6 миллиард доллардан 109,5 миллиардгача кўпайган. Forbes берган маълумотларга кўра «Норникель» эгаси Владимир Потанин бошқаларга қиёслаганда кўпроқ даромад топган. Пандемия даврида унинг даромадлари 19,7 миллиарддан 26,1 миллиардгача кўпайган (6,4 миллиард доллар қўшилмоқда). 2020 йилда бизнесмен Forbes’нинг россиялик миллиардерлар рейтингида биринчи ўринни эгаллаганди.

Пандемия даврида бойиш рейтингининг иккинчи ўрнини «Новатэк» бошқаруви раҳбари Леонид Михельсон банд этган. Ўтган оралиқда у 5,4 миллиард долларга бойиган (бойлиги 17,1 миллиарддан 22,5 миллиард долларга етган). НЛМК эгаларидан бири Владимир Лисиннинг бойлиги эса 21 миллиард долларга етди (март ойида унинг капитали 18,1 миллиард доллар эди). «Северстал» президенти Алексей Мордашов ва «Лукойл» эгаси Вагит Алекперов пандемия даврида мос равишда 2,3 миллиард (19,1 миллиард долларга етди) ҳамда 5,6 миллиард долларга (20,8 миллиард доллар) бойиган.

9 мартда жаҳон бозорида нефть нархининг кескин тушиб кетиши оқибатида миллиардерларининг кўрган зарари миқдори 8,8 миллиард долларни ташкил қилди. Bloomberg йил охирига бориб 24 нафар россиялик энг бой бизнесменларнинг бойлиги 13,91 миллиард долларга камайиши прогноз қилинаётгани ҳақида ёзган. Маълумотларга кўра, бунда энг кўп зарар кўрадиган бойлардан бири Алекперов бўлади (Forbes унинг 2,1 миллиард доллар зарар кўрганини ёзган, Bloomberg эса зиённи 3,54 миллиард доллар дея ҳисобламоқда).