Ўзбекистонда 2020 йилнинг биринчи чорагида ишсизлик даражаси 9,4 фоизни ташкил қилди. Бу ҳақда 26 май куни Олий Мажлис Қонунчилик палатасидаги Ўзбекистон Либерал-демократик партияси фракциясининг видеоконференц алоқа тарзида бўлиб ўтган навбатдаги йиғилишида маълум қилинди.
Қайд этилишича, энг юқори ишсизлик даражаси — 9,8 фоиз Самарқанд ва Сурхондарё вилоятларида қайд этилган. Жиззах, Қашқадарё, Сирдарё ва Фарғона вилоятларида бу кўрсаткич 9,7 фоизни ташкил этган. Энг паст кўрсаткич эса Тошкент шаҳрига (7,8 фоиз) тўғри келган.
Ишга жойлаштиришга муҳтож меҳнат билан банд бўлмаган аҳоли (ишсизлар) сони 1 миллион 399 минг 700 кишини ташкил этган.
Йиғилишда ишсиз шахсларни ҳақ тўланадиган жамоат ишларига кенг жалб этиш асосида аҳоли бандлигини таъминлаш учун Бандлик ва меҳнат муносабатлари вазирлиги ҳузуридаги Жамоат ишлари жамғармасининг ташкил этилгани айтилди.
Вазирлик ҳузуридаги Жамоат ишлари жамғармаси ҳисоб рақамида 2019 йилда молиялаштирилган маблағлар ҳисобидан 16,9 миллиард сўм маблағ қолдиғи мавжуд бўлиб, 2020 йил биринчи чорак давомида республика бюджетидан 45 миллиард сўм маблағ ажратилган.
Халқ вакиллари партия Сайловолди дастуридаги устуворликлардан келиб чиқиб, аҳоли бандлигини тўлиқ таъминлаш ва меҳнатга муносиб ҳақ тўлаш, янги иш ўринларини яратиш, ишсизлик даражасини қисқартириш ҳозирги пандемия шароитида ҳар қачонгидан ҳам муҳимлигини айтиб, оилавий тадбиркорлик, касаначилик, томорқа хўжалиги ва хусусий бизнесни қўллаб-қувватлаш ҳисобига аҳоли бандлигини таъминлаш ҳамда фуқаролар оилавий бюджети даромадларини ошириш мумкинлигини таъкидлаб ўтган.
Эслатиб ўтамиз, Инқирозга қарши курашиш республика комиссиясининг қарори қабул қилинган, мазкур қарор билан эпидемия шароитида иқтисодиёт тармоқларининг барқарор ишлашини таъминлаш, аҳоли ўртасида ишсизлик ошиб кетишининг олдини олиш ҳамда бюджет тушумларини таъминлаш учун иқтисодиётнинг қуйидаги бир қатор йўналишлари фаолиятига рухсат берилганди.
Изоҳ (0)