Навоий вилоятида уч ойлик фарзандини уч хонали уйга алмаштираётган аёл ва чақалоқнинг бобоси қўлга олинди. Бу ҳақда Навоий вилояти ИИБ ахборот хизмати хабар берди.
Маълум қилинишича, 2020 йилнинг 23 май куни Навоий вилояти ИИБ ҳамда Кармана туман ИИБ ходимлари ҳамкорлигида тезкор тадбир ўтказилган. Тадбир давомида уч ойлик болани уйга алмаштиришга уриниш ҳолатига чек қўйилган.
Навоий вилояти ИИБ томонидан хабар берилишича, 1987 йил Навоий вилоятида туғилган, ҳозирда Навоий шаҳрида ижарада вақтинчалик яшаб келаётган фуқаро З.Ў. 2020 йилда туғилган фарзанди Б.Ў.ни тахминий баҳоси 250 миллион сўм бўлган уч хонали уй эвазига сотаётган вақтда қўлга олинган.
Аниқланишича, З.Ў. ушбу жиноий ишни отаси — 1951 йил Навоий вилоятида туғилган А.Ў. билан шерикчилик асосида содир этган.
Мазкур ҳолат юзасидан Кармана туман ИИБ томонидан ҳозирда терговга қадар текширув ҳаракатлари давом этмоқда.
Аввалроқ Қорақалпоғистонда 13 ёшли фарзандини 15 минг долларга пуллаётган аёл, Хоразмда 2 ёшли фарзандини 7700 долларга сотмоқчи бўлган аёл қўлга олингани ҳақида хабарлар берилган эди.
Изоҳ (0)