Халқаро олимпия қўмитаси президенти (ХОҚ) Томас Бах Токио мезбонлигидаги ёзги Олимпиада 2021 йилда ўтказилмай қолса, бекор қилиниши сабабини тушунтирди.
ХОҚ ва Токио—2020 ижроқўми март ойида Олимпиада коронавирус сабаб 2021 йилга қолдирилганини маълум қилганди. Ижроқўм вакили Ёширо Мори коронавирус билан боғлиқ вазият келаси йилда ҳам назоратга олинмай қолса, Олимпия ўйинлари бекор қилинишини маълум қилганди. Аввалроқ Бах Олимпиадани 2021 йилнинг ёзида ўтказиш «сўнгги вариант» эканини айтганди.
«Очиғини айтсам, буни тушуниб турибман, чунки ҳар сафар ижроқўмга 3 ёки 5 минг кишини ишга ёллаб бўлмайди. Ҳар йили барча спорт тақвимини ўзгартириб бўлмайди. Спортчиларда ноаниқлик бўлиши керак эмас. Шу сабаб япониялик шерикларимизнинг мазкур ғоясини тушунаман.
Олимпиадани ташкил қилиш йўлида дуч келадиган турли сценарийларга тайёр бўлимиз керак. Бу соғлиқни сақлаш чоралари билан боғлиқ. Спортчилар ва Олимпиаданинг қолган иштирокчиларини карантинга олишга тўғри келиб қолиши мумкин», — дейди Бах.
Шунингдек, ХОҚ раҳбари Токио Олимпиадасини томошабинларсиз ўтказиб бўлмаслигини таъкидлади.
«Ўйинлар томошабинларсиз ўтишини хоҳламаймиз. Сабаби Олимпия руҳияти ишқибозлар бирдамлигидан иборат. Бутун дунё мухлислари Олимпия стадионига жам бўлади. Айнан шу Олимпиадани мукаммал қилади», — дейди функционер.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)