Россияда бир суткада коронавирусга чалиниш бўйича ҳолат 8849 тага кўпайди, 127 киши эса вафот этди

Россияда 21 май ҳолатига кўра 8849 киши коронавирусга чалингани қайд этилди. Бу бир кун аввалги кўрсаткичдан 85 кишига кўпдир.

Коронавирусга қарши кураш бўйича тезкор штаб маълумотларига кўра, мамлакатда пандемия бошланганидан буён 317 554 киши коронавирусга чалинди.

Сўнгги суткада касалланганларнинг энг кўпи Москва (2913 нафар), Москва вилояти (892 нафар), Санкт-Петербург (408) шаҳарларида аниқланган.

Шунингдек, сутка давомида 127 нафар бемор, умумий ҳисобда эса 3099 нафар бемор вирус қурбони бўлган. Касалланганларнинг 7289 нафари тузалиб, уларнинг умумий сони 92 861 нафарга етди.

Мамлакатда коронавирусни аниқлаш бўйича сўнгги суткада 262,8 мингта, умумий ҳисобда эса 7,8 миллионта тест ўтказилган.

Россия коронавирусга члинганлар сони бўйича АҚШдан кейин иккинчи ўринда турибди. Жонс Ҳопкинс маълумотларига кўра, 21 май куни дунёда вирус юқтирганлар сони 5 миллион кишидан ошиб кетган. Worldometer сервисида эса бу кўрсаткич 20 май куни қайд этилганди.