Turkish Airlines авиакомпанияси июнь ойида маҳаллий ва халқаро рейсларни тиклашни режалаштирмоқда. Бу ҳақда Sabah нашри хабар бермоқда.
Қайд этилишича, маҳаллий авиақатновлар 4 июндан, халқаро авиақатновлар эса 10 июндан тикланади.
Компания директорлар кенгаши раҳбари Илкар Ойжининг таъкидлашича, йўловчиларга самолёт салонига қўл юки олиб кириш тақиқланади. Бу турдаги юк учун мўлжалланган 8 килограмм асосий багаж оғирлигига қўшилади. Салонга фақат қўл сумкаларини олиб киришга рухсат берилади.
Аввалроқ Туркия Соғлиқни сақлаш вазирлиги 20 майдан бошлаб дунёнинг 31 мамлакати, хусусан, Ўзбекистондан бўлган тиббиёт туристлари учун ўз чегараларини очишини маълум қилганди.
Жонс Ҳопкинс маълумотларида қайд этилишича, 21 май ҳолатига кўра, Туркияда 152 мингдан ортиқ киши коронавирусга чалинган, 4 222 киши касалликдан вафот этган.
Изоҳ (0)