Чеченистон Ички ишлар вазирлиги Рамазон ойининг тугаши муносабати билан нишонланувчи Рамазон Ҳайити байрами кунлари республика бўйлаб ҳаракатланишни тақиқлаб қўйди.
Республика ички ишлар вазири Руслан Алхановнинг баёнотида таъкидланишича, «ўзини изоляциялаш» режимини бузганлар қонун доирасида кўрсатилган тартибда қаттиқ жазоланади.
Чеченистон Соғлиқни сақлаш вазирлигининг маълумотларига кўра, республикада коронавирусга чалиниш бўйича 1005 та ҳолат қайд этилган (уларнинг 92 нафари шифокор), ҳозирга қадар 620 киши соғайган бўлса, 11 киши вафот этган.
Шунингдек, Кабардин-Болқорда ҳам Рамазон Ҳайити муносабати билан дам олиш кунлари эълон қилинган. Доғистонда эса байрам сабаб қўшимча чекловлар жорий этилган.
Аввалроқ Россия президенти Владимир Путин Доғистондаги коронавирусга боғлиқ вазият сабаб барча мусулмонлардан Ҳайит байрамини уйда ўтказишга чақирган эди.
Аввалроқ Ўзбекистон мусулмонлари идораси раиси, муфтий Усмонхон Алимов жоме масжидларда Ҳайит намози ўқилиши тўғрисида тарқатилаётган хабарларга муносабат билдириб, мамлакатда Ҳайит намози қай тарзда ўқилиши борасида расман хабар берилишини маълум қилганди.
Эслатиб ўтамиз, Ўзбекистон мусулмонлари идорасининг Рамазон ойини ўтказиш ҳақидаги баёнотида таровеҳ намозларини уйда ўқиш тавсия қилинган, кейинчалик таровеҳ ва жума намозларининг уйда ўқилиши масаласига изоҳ берилган, карантинга доир фатволар эълон қилинганди.
Изоҳ (0)