Yevropa tiklanish va taraqqiyot banki tomonidan shakllantirilgan, umumiy miqdori 1 milliard dollar bo‘lgan “Birdamlik paketi” hisobidan to‘rtta o‘zbek tijorat banklariga umumiy qiymati 220 million dollar bo‘lgan kichik va o‘rta biznes loyihalarini moliyalashtirish uchun kredit liniyalari va savdoni moliyalashtirish liniyalari taqdim etiladi. Bu haqda Investitsiyalar va tashqi savdo vazirligi ma’lum qildi.

Foto: The Kharkiv Times

Qayd etilishicha, 7-aprel kuni investitsiyalar va tashqi savdo vaziri Sardor Umrzoqov YeTTB prezidenti Suma Chakrabarti bilan videokonferensiya orqali muloqotida O‘zbekiston tomonidan berilgan so‘rovga javoban ushbu masala muhokama qilingan.

Shu bilan birga, aholi va korxonalar tomonidan to‘lab boriladigan kommunal to‘lovlar tushumlarini pasayishi sababli qiyinchilikka duch kelgan hududiy kommunal korxonalarning aylanma kapitalini qo‘llab-quvvatlash uchun YeTTB 100 million dollar miqdorigacha bo‘lgan moliyalashtirishni taqdim etish masalasini ko‘rib chiqmoqda.

Eslatib o‘tamiz, O‘zbekistonda koronavirus sababli yuzaga keladigan iqtisodiy muammolarga qarshi kurashish uchun 10 trillion so‘m ajratilgan.

Prezident Shavkat Mirziyoyev 9-aprel kuni koronavirus pandemiyasi sharoitida O‘zbekiston bank tizimining barqaror ishlashini hamda iqtisodiyotga moliyaviy ko‘makchi bo‘lishini ta’minlash masalalari bo‘yicha o‘tkazgan yig‘ilishda ish haqini to‘lash uchun korxonalarga kreditlar ajratish zarurligini ta’kidlagandi.