Сурия ҳукумати президент Башар Асаднинг тутинган укаси Рами Махлуфга тегишли активларни музлатди. Reuters’нинг хабар қилишича, 19 майда ҳукуматнинг бу борадаги ҳужжати қабул қилинган. Унда активларнинг Махлуфга тегишли Syriatel мобил алоқа операторининг бюджетга тўловларни тўлаши учун музлатилгани қайд этилган.
Рами Махлуф Башар Асад онасининг қариндоши, жияни ҳисобланди. У Суриядаги энг бой кишилардан бири. Мамлакатда мобил алоқа бозорининг ярмидан кўпини назоратга олган Syriatel Махлуфнинг асосий мулкларидан бири. Бундан ташқари Махлуф тамаки, автомобиль ишлаб чиқариш, меҳмонхона бизнеси, молия ва суғурта сектори ҳамда энергетика соҳасида ҳам бизнес лойиҳаларига эга. Махлуфнинг бойлиги 5 миллиарддан 10 миллиард АҚШ долларигача баҳоланган, фуқаролар уруши бошлангунига қадар унинг бошқарувидаги компаниялар Сурия иқтисодиётининг 60 фоизини назорат қиларди.
Мавзуга доир: Financial Times: Башар Асаднинг қариндошлари «Москва-Сити»дан 19 та кўчмас мулк харид қилган
Махлуф ҳамда Асад ўртасида келишмовчилик кузатилгани ҳақидаги дастлабки хабарлар 2019 йил ёзида ОАВда пайдо бўлган. У вақтда Россия Башар Асаддан кредит бўйича бир неча миллиард доллар қарзни тўлашни талаб қилган, президент табиий равишда Махлуфга юзланган, бироқ жиян ушбу маблағни тўлашни истамаган. Ўшанда Syrian Observatory for Human Rights ҳуқуқ ҳимоячилари ташкилоти Россиядан келиб тушган илтимосларга кўра Махлуфга тегишли мамлакат жанубидаги «Ал-Бўстон» жангарилар ташкилотини тарқатиб юборганини маълум қилган.
Ушбу воқеалардан кейин бир неча ой давомида икки қариндошнинг жанжали юзасидан ҳеч қандай маълумот берилмади, апрель охири ва май бошларида Махлуф Facebook’да видеомурожаатлар қолдирди. Уларда миллиардер Сурия ҳукуматининг Syriatel’дан бюджетга 185 миллион доллар тўлашни, ўзидан эса компания бошқарувидан кетишни талаб қилаётганини таъкидлаган. Махлуф кучишлатар тизимларни шантаж ва Syriatel’нинг ўнлаб ходимларини ноқонуний равишда қамоққа олганликда айблаган. Жарималарни тўлаши, бироқ компания раҳбарлигидан кетмаслигини айтган.
Асаднинг ўзи жияни билан боғлиқ ушбу вазиятга изоҳ бермаган. Таҳлилчилар Махлуф билан низога ҳукуматда кучли инқироз ҳукм сураётгани ва маблағлар йўқлиги, Асад ҳукумати катта қарзлар, фуқаролар уруши деб иқтисодиётнинг оғир аҳволга келгани ва коррупцияга қарши кураш баҳонасида бизнесменлардан пул ундиришга уринаётгани сабаб бўлганини тахмин қилмоқда. Сурия президенти 2019 йил октябрда хусусий секторнинг барча вакиллари давлат маблағларини сарфлагани ва энди ўша пулларни бюджетга қайтариш вақти келганини билдирганди.
Изоҳ (0)