Шавкат Мирзиёев Адиблар хиёбонида очилган Тошкент шаҳри музейини кўздан кечирди

Шавкат Мирзиёев Адиблар хиёбони ёнида ташкил қилинган Тошкент шаҳри музейи билан танишди. Бу ҳақда Президент матбуот хизмати хабар қилган.

Хабарда қайд этилишича, Президент 11 январь куни Тошкентдаги бунёдкорлик ишлари билан танишган вақтида Тошкент шаҳри музейини ташкил этиш бўйича тавсиялар берганди. Адиблар хиёбони ёнидаги бино реконструкция қилиниб, мазкур музей шу ерга жойлаштирилган.

«Тошкент шаҳри музейи 2200 йиллик тарихга эга бўлган ҳудуднинг тарихи, урф-одат ва анъаналари, илм-фани, маданияти ва санъатини ўзида акс эттирган. Бу ерда мингга яқин экспонатлар тўпланган. Музей фондини бойитиш изчил давом эттирилмоқда», — дейилади хабарда.

Биринчи қаватда «Тошкент — илм-фан маркази», «Тошкент — бағрикенглик шаҳри», «Амалий санъат. Кундалик ҳаёт ва маданият» деб номланган экспозициялар ташкил этилган. Иккинчи қаватда қадимий иш қуроллари, хўжалик буюмлари, қадамжоларнинг макетлари намойишга қўйилган.

Экспонатларга ўзбек, рус ва инглиз тилларидаги матнлар билан шарҳ берилади. Мониторлар, инфокиосклар ва бошқа технологиялар ёрдамида қўшимча маълумотлар тақдим этилади.

«Бу биринчи қадам. Тошкентда илмий тадқиқотлар учун жуда катта манба бор. Лекин шу пайтгача яхлит ва тўлиқ ўрганилмаган. Энди 2200 йиллик тарихни даврма-давр ўрганиш, музейни ашёвий далиллар билан бойитиб, шаҳар цивилизациясини тўла юзага чиқариш керак», — деган Шавкат Мирзиёев.

Ташриф чоғида илмий-тадқиқот институти ташкил қилиш, археологларга шароит яратиш, изланишлар натижаси бўйича китоблар чоп этиш зарурлиги таъкидланди. Маҳалла ва мактаб ёшларини бу ерга олиб келиш, бошқа шаҳарларда ҳам шундай музейлар ташкил этиш бўйича кўрсатмалар берилди.