Урганчда карантин ҳудудидан қочишга уринган шахсни тўхтатиш учун ҳарбий соқчи ҳавога ўқ узди

Урганчда карантин ҳудудидан қочмоқчи бўлган 44 ёшли эркак қўлга олинди. Бу ҳақда «Дарё»га Шимоли-ғарбий ҳарбий округ матбуот хизмати хабар берди.

Маълум бўлишича, 18 май куни соат 13:30 лар атрофида Урганч шаҳрида жойлашган Хоразм вилояти ногиронларни реабилитация қилиш ва протезлаш марказида эҳтиёт чораси сифатида ташкил этилган ёпиқ карантин ҳудудида сақланаётган, 1976 йилда Тошкент шаҳрида туғилган фуқаро И.Р. марказ ташқари қисмига ўралган темир панжара олдига яқинлашишга уринган.

Ушбу ҳолатни пайқаган ва Урганч гарнизонидан тайинланган сергак соқчи — кичик сержант Л.А. фуқаро И.Р.ни оғзаки огоҳлантириб, орқага қайтишни сўрайди ва бу ҳолат бўйича гуруҳ каттасига маълумот берган. Ўз навбатида гуруҳ каттаси шу заҳоти содир бўлган воқеа бўйича карантин штабига маълумотни етказган.

Аммо шу куннинг ўзида соат 14:10 лар атрофида белгиланган тартиб-қоидаларга ҳамда тушунтириш ишларига амал қилмасдан фуқаро И.Р. ёпиқ карантин ҳудудидан чиқиб кетиш режасини иккинчи марта амалга оширишга уринган.

Ушбу ҳолатни яна ўша соқчи — кичик сержант Л.А. фуқаро И.Р.нинг қочишга уринаётганини пайқаб, уни оғзаки огоҳлантиришга уриниб кўрган. Соқчининг огоҳлантиришига қарамай, фуқаро И.Р. темир панжарадан ошиб ўтишга ҳаракат қилган. Натижада соқчи махсус йўриқномага асосан шахсий қуролидан осмонга қарата огоҳлантирувчи ўқ отишга мажбур бўлган. Шошиб қолган фуқаро И.Р. қоровул шахсий таркиби томонидан тезда қўлга олинган.

Қайд этилишича, И.Р. карантин штабига топширилиб, унга нисбатан ўрнатилган тартибда карантин қоидаларини бузганлик ҳолати бўйича маъмурий баённома тузилган.

Эслатиб ўтамиз, ёпиқ карантин ҳудудларида кириб-чиқиш назоратини амалга ошириш ва ҳудуд хавфсизлигини таъминлаш учун Мудофаа вазирлиги ҳарбий хизматчилари билан бирга куч тузилмалари вакилларидан иборат қоровуллик хизматлари жорий этилган.