2020 йил январь март ойларида Қозоғистон ва Ўзбекистон ўртасидаги савдо ҳажми 612 миллион долларни ташкил қилган, бу ўтган йилнинг мос даврига нисбатан 1,6 фоизга паст кўрсаткич, деб хабар қилган QazTrade савдо сиёсатини ривожлантириш маркази матбуот хизмати маълумотига таяниб, «Интерфакс—Қозоғистон».
Икки давлат ўртасидаги савдо ҳажмининг салбий ўсиши Қозоғистон экспортининг камайиши билан боғлиқ. 2020 йилнинг I чорагида нефть маҳсулотлари, мис рудалари, кунгабоқар уруғлари каби маҳсулотлар экспорти камайган.
Ҳисобот даврида Қозоғистон товарларининг Ўзбекистонга экспорти 5,2 фоизга камайиб, 464,8 миллион долларни ташкил қилган. Қозоғистондан Ўзбекистонга импорт 12,2 фоизга ўсиб, 147,2 миллион долларга етган.
Маълумотларга асосан Ўзбекистонга экспортнинг пасайиши нефть маҳсулотлари (4,8 бараварга — 7,6 миллион АҚШ долларигача), мис рудалари ва концентратларнинг (44 баравар — 22 миллион доллардан 500 минг долларгача) ва кунгабоқар уруғи (2,6 баравар — 9,4 миллион) каби товарларни етказиб бериш ҳажмининг камайгани билан изоҳланади.
Қозоғистоннинг асосий импорт товарлари табиий газ — 49,3 миллион доллар (умумий ҳажмнинг 33,5 фоизи), полимерлар —12,2 миллион доллар (8,3 фоиз), узум — 7,1 миллион (4,8 фоиз), томатлар —7 миллион (4,8 фоиз), карам — 5,7 миллион (3,9 фоиз), қуруқ сабзавотлар — 4,2 миллион (2,9 фоиз).
2019 йил якунлари бўйича Қозоғистон ва Ўзбекистон икки томонлама савдо айланмаси 4,1 миллиард долларни ташкил қилган. Икки давлат 2020 йил охиригача ушбу кўрсаткични 5 миллиард долларга етказишни мақсад қилганди.2020 йил 26 февралда Ўзбекистон ва Қозоғистон ўртасида 500 миллион долларлик 30 та келишув имзоланган.
Изоҳ (0)