Чироқчи тумани ҳокими Хуррам Жўраев 19 май куни Қизилчовра қишлоғида бўлиб, селдан зарар кўрган хонадон вакиллари билан учрашган. Сел оқибатида қулаб тушган уйларни бузиш учун эса 40 нафар ишчи жалб қилинган. Бу ҳақда «Дарё»га туман ҳокимлиги ахборот хизмати раҳбари Собит Раимқулов маълум қилди.
«Дарё»да эълон қилинган мақолада жорий йил 8 май куни келган сел оқибатида 32 хонадон зарар кўргани, иккита уй қулаб тушгани ҳақида хабар берилганди.
Таъкидланишича, қишлоққа борган туман ҳокими ва прокурори селдан зарар кўрган 32 та хонадонга бирма-бир кириб чиққан.
«Туман ҳоким Хуррам Жўраев ва прокурор Баҳодир Худойқуловлар селдан жабр кўрган фуқаролар хонадонида бўлиб, тошқиндан зарар кўрган уйларни бузиб олишда ишчи кучи ажратилишини айтди, — дейди Собит Раимқулов. — Шу куннинг ўзида туман ободонлаштириш бошқармасининг 40 нафар ходими уйи қулаб тушган Суннат Товшаров ва Шоабдулла Менглиевларнинг уйларини бузиш ишларига киришди».
Қўшимча қилинишича, қишлоқ аҳолиси билан мулоқот қилган раҳбарлар катта зовур ва сув йўллари ҳам тозаланишини маълум қилим, кўнгилли аҳолини ёрдамга чақирган.
Изоҳ (0)