Бухоро вилоятининг Қоракўл туманида 19 май куни одам ўлими билан якунланган ЙТҲ содир бўлди. Бу ҳақда ЙҲХББ хабар бермоқда.

Фото: ЙҲХББ

Ҳодиса соат 13:30 ларда 4Р-76 Қоракўл–Янгибозор–Жиғачи автомобиль йўлининг 7-километрида юз берган. 1989 йилда туғилган М.Ж. Nexia тезлигини меъёридан оширган ҳолда бошқараётиб, олдинда кетаётган автомобилни қувиб ўтиш мақсадида қарама-қарши йўналишга чиққан. Шу вақтда 1981 йилда туғилган Н.Т. бошқарувидаги Lacetti’нинг олд қисмига урилиб, ЙТҲ содир этган.

Фото: ЙҲХББ

Оқибатда Nexia олди ўриндиғида ўтирган йўловчи 2001 йилда туғилган З.Н. исмли қиз бола оғир тан жароҳатлари билан шифохонада вафот этган.

Фото: ЙҲХББ

Ушбу автомобиль ҳайдовчиси М.Ж. ва йўловчиси 1979 йилда туғилган С.А. (аёл) тан жароҳати олиб шифохонага ётқизилган.

Фото: ЙҲХББ

Мазкур ЙТҲ юзасидан Қоракўл тумани ИИБ ТБ томонидан суриштирув ишлари олиб борилмоқда.

Эслатиб ўтамиз, 12 май куни Бухоро вилоятининг Ромитан туманида трактор тиркамаси ағдарилиб кетиши оқибатида 33, 34 ва 38 ёшли аёллар вафот этган. Бу аёллар ҳайдовчининг хотини, синглиси ва келини бўлган. Шунингдек, 17 май куни Қашқадарё вилоятининг Чироқчи туманида аёл ҳайдовчи бошқарувидаги Matiz автомобили ағдарилиб кетган. Оқибатда машинада йўловчи сифатида кетаётган 41 ёшли аёл воқеа жойида вафот этган.