Buxoro viloyatining Qorako‘l tumanida 19-may kuni odam o‘limi bilan yakunlangan YTH sodir bo‘ldi. Bu haqda YHXBB xabar bermoqda.
Hodisa soat 13:30 larda 4R-76 Qorako‘l–Yangibozor–Jig‘achi avtomobil yo‘lining 7-kilometrida yuz bergan. 1989-yilda tug‘ilgan M.J. Nexia tezligini me’yoridan oshirgan holda boshqarayotib, oldinda ketayotgan avtomobilni quvib o‘tish maqsadida qarama-qarshi yo‘nalishga chiqqan. Shu vaqtda 1981-yilda tug‘ilgan N.T. boshqaruvidagi Lacetti’ning old qismiga urilib, YTH sodir etgan.
Oqibatda Nexia oldi o‘rindig‘ida o‘tirgan yo‘lovchi 2001-yilda tug‘ilgan Z.N. ismli qiz bola og‘ir tan jarohatlari bilan shifoxonada vafot etgan.
Ushbu avtomobil haydovchisi M.J. va yo‘lovchisi 1979-yilda tug‘ilgan S.A. (ayol) tan jarohati olib shifoxonaga yotqizilgan.
Mazkur YTH yuzasidan Qorako‘l tumani IIB TB tomonidan surishtiruv ishlari olib borilmoqda.
Eslatib o‘tamiz, 12-may kuni Buxoro viloyatining Romitan tumanida traktor tirkamasi ag‘darilib ketishi oqibatida 33, 34 va 38 yoshli ayollar vafot etgan. Bu ayollar haydovchining xotini, singlisi va kelini bo‘lgan. Shuningdek, 17-may kuni Qashqadaryo viloyatining Chiroqchi tumanida ayol haydovchi boshqaruvidagi Matiz avtomobili ag‘darilib ketgan. Oqibatda mashinada yo‘lovchi sifatida ketayotgan 41 yoshli ayol voqea joyida vafot etgan.
Izoh (0)