Олий Мажлис Сенатининг тўртинчи ялпи мажлисида маъқулланган «2020 йил учун Ўзбекистон Республикасининг давлат бюджети тўғрисида»ги қонунига ўзгартириш ва қўшимчалар киритиш ҳақида»ги қонун Президент томонидан имзоланди. Бу ҳақда Сенат матбуот хизмати хабар берди.
Мазкур қонун Ўзбекистон Президентининг «Коронавирус пандемияси ва глобал инқироз ҳолатларининг иқтисодиёт тармоқларига салбий таъсирини юмшатиш бўйича биринчи навбатдаги чора-тадбирлар тўғрисида»ги фармони ҳамда «Коронавирус пандемияси даврида Ўзбекистон Республикаси давлат бюджети барқарорлигини таъминлаш ва биринчи навбатдаги тадбирларни ўз вақтида молиялаштириш чора-тадбирлари тўғрисида»ги қарорига мувофиқ қабул қилинган.
Сенатнинг Бюджет ва иқтисодий ислоҳотлар масалалари қўмитаси раиси Эркин Гадоевнинг маълум қилишича, янги қонун коронавирус пандемияси ва глобал инқироз даврида давлат бюджетининг барқарорлигини таъминлаш ва устувор йўналишларини инобатга олган ҳолда харажатларни оптималлаштириш мақсадларига хизмат қилади.
Республика бюджетидан фермер хўжаликлари томонидан ишлатиладиган электр энергияси қийматини қоплаш, адвокатлар томонидан юридик ёрдам кўрсатилганлиги учун ҳақ тўлаш ҳамда нодавлат мактабгача таълим ташкилотларига бериладиган субсидиялар маҳаллий бюджетлар орқали молиялаштириши белгиланаётганлиги сабабли Қорақалпоғистон Республикаси бюджети, вилоятлар ва Тошкент шаҳар маҳаллий бюджетларига бериладиган бюджетлараро трансфертлар кўпайтирилмоқда.
Қонун билан коронавирус пандемияси ва глобал инқироз даврида давлат бюджетининг барқарорлигини таъминлаш мақсадида бюджет харажатлари оптималлаштирилади.
Аввалроқ коронавирус Ўзбекистон давлат бюджетига 2020 йилнинг 3 ойида қандай таъсир кўрсатгани тўғрисида хабар берилганди.
Изоҳ (0)