Тошкент шаҳар ИИББ матбуот хизматининг маълум қилишича, коронавируснинг тарқалишини олдини олиш бўйича Республика махсус комиссияси томонидан карантин чораларини юмшатиш бўйича қарор қабул қилингач, айрим фуқаролар санитария-эпидемиология қоидаларига умуман риоя қилмай қўйган.
Таъкидланишича, шаҳар кўчаларида тиббий ниқоб тақмаган ёки уни тўғри тақмасдан юрган фуқаролар кўпаймоқда.
Тошкент шаҳар ИИББ ходимлари ва санитария-эпидемиология назорати хизмати ишчиларидан эслатма берилган: Маъмурий жавобгарлик тўғрисидаги кодексининг 54 моддасига (Эпидемияларга қарши кураш қоидаларини бузиш) биноан карантин ва инсон учун хавфли бўлган бошқа юқумли касалликлар пайдо бўлиши ҳамда тарқалиши шароитида ваколатли органнинг махсус талабларига зид равишда жамоат жойларида ниқобсиз бўлиш, фуқароларга базавий ҳисоблаш миқдорининг йигирма бараваридан ўттиз бараваригача, мансабдор шахсларга эса ўттиз бараваридан эллик бараваригача миқдорда жарима солишга сабаб бўлади.
Хусусан, 16 май куни Тошкентда жами 144 киши, 17 май куни эса 104 киши жамоат жойида тиббий ниқобсиз юрган.
«Сизлардан ўз саломатлигингиз ва атрофдагиларнинг хавфсизлиги масаласига жиддий қарашингизни сўраймиз», — дейилади маълумотда.
Мавзуга доир: Ўзбекистонда карантин 1 июнгача узайтирилди, бироқ темир йўл ва авиақатновлар қисман қайта тикланади
Изоҳ (0)