Ўзбекистонда 19 май соат 23:00 ҳолатига кўра, коронавирусга чалинганлар сони 30 кишига кўпайиб, 2855 нафарга етди, дея хабар бермоқда Соғлиқни сақлаш вазирлиги. Аввалроқ, 19 май соат 16:00 ҳолатига кўра, 2825 кишида касаллик аниқлангани ҳақида хабар берилган эди.
Аниқланган янги касалланиш ҳолатларининг 6 таси олдиндан карантинда бўлган фуқаролар, 24 таси хориждан келиб, карантинга олинган шахслар орасидан қайд этилди (уларнинг 19 нафари 14 май куни чартер рейс билан Санкт-Петербургдан, 5 нафари 15 май куни Қозоғистондан келган).
19 майда кун давомида жами 64 кишида коронавирус инфекцияси аниқланган бўлиб, уларнинг 57 нафари хориждан келган, олти нафари Самарқанд вилояти ва бир нафари Тошкентда олдин карантинга олинган фуқаролардир.
Айни пайтда Ўзбекистонда 2338 нафар коронавирус инфекциясига чалинган фуқаро бутунлай соғайган, хусусан, 19 майда кун давомида мамлакат бўйича жами 24 киши касалликдан соғайди. Ўзбекистоннинг тўққиз ҳудудидаги ихтисослашган тиббиёт муассасаларида 504 нафар бемор даволанмоқда.
Ўзбекистонда илк бор коронавирус инфекцияси билан касалланиш ҳолати қайд этилганидан буён 13 киши унинг асоратлари оқибатида вафот этди.
Изоҳ (0)