Наманганда Сардобадаги фалокатдан сўнг сув омборларининг ҳолати тўлиқ ўрганиб чиқилди. Бу ҳақда вилоят сув омборларидан фойдаланиш бошқармаси бошлиғи Жаҳонгир Умаров маълум қилди, дея хабар беради «Дарё» мухбири Азизбек Абдувалиев.
Вилоятда жами 9 та сув омбори мавжуд. Улардан энг йириги Чуст туманидаги Резаксой сув омбори (лойиҳавий сиғими 300 миллион метр куб) бўлса, энг кичиги Косонсой туманидаги Қорасув сув омбори (6,3 миллион метр куб) ҳисобланади.
«Сардобада юз берган фалокатдан сўнг Намангандаги барча сув омборлари ва дамбалар ҳолати мутахассисларимиз томонидан ‘Давсувхўжаликназорат’ инспекцияси ҳамда ФВВ ходимлари билан ҳамкорликда бирма-бир ўрганиб чиқилди. Ҳар бир сув омборида техноген ва фавқулодда вазиятлар содир бўлганда хабардор қилиш тизими ишлаб чиқилган. Улар аҳолини огоҳлантирувчи сиреналар билан жиҳозланган, алоқа воситалари ва қўшимча электр таъминоти билан таъминланган», — дейди Жаҳонгир Умаров.
Умаровга кўра, сув омборларида баҳор ва ёз ойларида содир бўлиши мумкин бўлган сел-тошқин сувларини ушлаб қолиш имконини берувчи «захира сиғим» яратилади, яъни сув омбор ҳавзасида бўш жой қолдирилади. Масалан, Намангандаги сув омборларининг умумий сиғими 440,7 миллион метр куб бўлса, ҳозирда уларда 202 миллион метр куб сув йиғилган.
Шунингдек, Наманган шаҳридаги Ғирвонсой, Янгиқўрғон туманидаги Қандиён, Қизсой ва Гаистон, Тўрақўрғон туманидаги Кенгкулсой, Чортоқ туманидаги Бештол ва Қорамурут, Уйчи туманидаги Сассиқсой — жами 8 та сел омбори вилоят аҳолиси ва турли объектларни сел сувларидан ҳимоя этиш учун хизмат қилмоқда.
«Намангандаги сув омборлари сой ўзанларида жойлашган ва улар текисликда жойлашган сув омборларига қараганда анча хавфсиз саналади. Чунки ўзандаги сув омборларининг уч томони табиий дамба — қир-адирлик ёки тоғ-тошлардан иборат. Шундай бўлса ҳам вилоятдаги сув омборлари, улардаги гидротехник иншоотларнинг техник ҳолати доимий назоратда. Дамбалар ва қирғоқлар ҳолати бўйича мунтазам кузатув ишлари олиб борилиб, улардаги ҳар бир ўзгариш қайд қилиб борилмоқда», — дейди Жаҳонгир Умаров.
Маълумот учун, Сирдарё вилоятидаги Сардоба сув омборида содир бўлган фавқулодда вазият туфайли Сардоба, Оқолтин, Мирзаобод туманларидаги 24 та маҳалладан 90 мингга яқин фуқаро зудлик билан хавфсиз ҳудудга эвакуация қилинган; ҳодиса оқибатида камида 56 киши турли даражада тан жароҳати олган, тошқин зонасида қолиб кетган юзлаб одамлар қутқарилган.
Воқеа юз берган куниёқ Президент Шавкат Мирзиёев Сирдарё вилоятига етиб борди. У сув тошқини оқибатларини кўздан кечирди, офатдан жабрланган аҳоли билан мулоқотда бўлди, шароит яхшиланмагунича ҳеч бир раҳбар ҳеч қаерга кетмаслигини таъкидлади. Аллақачон қайта тикланиши бошланган тўғонни бир неча бор бориб кўрди, иш жараёни билан танишди. Тўғоннинг ёрилиши юзасидан жиноят иши қўзғатилган.
Изоҳ (0)