Ўзбекистоннинг янги таҳрирдаги «Таълим тўғрисида»ги қонуни лойиҳасига инклюзив таълим тушунчаси киритилди

Ўзбекистоннинг янги таҳрирдаги «Таълим тўғрисида»ги қонун лойиҳаси 19 май куни Олий Мажлис Қонунчилик палатасида иккинчи ўқишда қабул қилинди. Қонунга ҳар бир боланинг таълим олишдаги тенг ҳуқуқлилигини таъминлаш, ҳар қандай дискриминация ва камситишларнинг олдини олишга қаратилган инклюзив таълим тушунчаси ҳам киритилди. Бу ҳақда Қонунчилик палатаси ахборот хизмати хабар берди.

Маълум қилинишича, 19 май куни Олий Мажлис Қонунчилик палатасининг навбатдаги мажлиси бўлиб ўтди.

Мажлисда янги таҳрирдаги «Таълим тўғрисида»ги қонун лойиҳаси муҳокама қилинди. Таъкидланишича, депутатлар 5—6 май кунлари бўлиб ўтган палата мажлисида қонун лойиҳасини моддама-модда, бобма-боб муҳокама қилган. Муҳокама давомида бир нечта модда юзасидан бир фикрга келинмаганлиги сабабли улар устида ишларни давом эттириш ҳамда келгуси мажлисда ана шу моддалар атрофида тўхталиб ўтишга келишилган.

Қайд этилишича, қонун лойиҳасини такомиллаштириш мақсадида тегишли вазирлик ва идоралар вакиллари иштирокида лойиҳанинг қоида ва нормалари маромига етказилиб, ортиқча маъмурий тартиб-таомиллар ва тартибга солишнинг эскирган механизмларини бартараф этиш ҳисобига киритилган 7 та моддадан бутунлай воз кечилиб, аниқ соҳалардаги муносабатларни тартибга солувчи 9 та янги модда киритилди.

Шунингдек, қонун лойиҳасини такомиллаштириш жараёнида 238 та нормага тегишли ўзгартириш ва қўшимчалар киритилди. Лойиҳадан идоравий руҳдаги бир неча норматив-ҳуқуқий ҳужжатларни қисқартириш, умумий тусдаги, ҳаракатсиз ва ҳуқуқни қўллашга таъсир этмайдиган қонун ҳужжатларини қайта кўриб чиқиш натижасида 123 та норма чиқариб ташланди. Уларнинг ўрнига 54 та янги тўғридан-тўғри амал қилувчи нормалар киритилган.

Бундан ташқари, қонун лойиҳасига инклюзив таълим тушунчаси ҳам киритилди. Таъкидланишча, бу тушунчанинг киритилиши ҳар бир боланинг таълим олишдаги тенг ҳуқуқлилигини таъминлаш, ҳар қандай дискриминация ва камситишларнинг олдини олишга хизмат қилади.

Лойиҳага амалдаги қонунчиликда кўзда тутилмаган янги қоидалар киритилмоқда. Эндиликда қонун билан мамлакатда ёшидан қатъи назар, катта ёшдагилар учун умри давомида билим ва кўникмаларини мустаҳкамлаб бориш имкониятлари ҳам мустаҳкамланмоқда.

Эслатиб ўтамиз, «Мактабгача таълим ва тарбия тўғрисида»ги қонунда инклюзив гуруҳларга эга мактабгача таълим ташкилоти тушунчаси киритилган.