Тошкент вилоятининг Ангрен шаҳрида ўз фаолиятини йўлга қўйган «Авто идеал хизмати» МЧЖ 5 ой ичида 1506 нафар мижознинг ишончига кириб, уларнинг 1283 нафарини чув туширгани ҳақида хабар берилганди. Бош прокуратура матбуот хизматининг «Дарё»га маълум қилишича, МЧЖ томонидан фуқароларга етказилган зарар 30 миллиард сўмдан ошмоқда.
«Авто идеал хизмати» МЧЖ раҳбарлари 2019 йил октябрь ойидан 2020 йилнинг март ойига қадар йилига 5 фоизлик устама ҳақ эвазига бошланғич бадал сифатида жами 1506 нафар юридик ва жисмоний шахслар билан шартнома имзолаб, мазкур шартномаларга асосан 1506 нафар мижоздан автомашинанинг 20-30 фоиз олдиндан тўлови сифатида жами 36,3 миллиард сўм пулни жамият ҳисобига туширган.
Жамият мансабдор шахслари юқорида келиб тушган пул маблағлари ҳисобидан 228 нафар мижозга 23,6 миллиард сўмлик автомашиналарни етказиб бериб, қолган 1283 нафар мижозга, улар томонидан автомашинанинг 20-30 фоиз миқдорида бошланғич бадал сифатида тўланган 30,5 миллиард сўм пул маблағлари эвазига автомашинани етказиб бермасдан ёки тўланган пул маблағларини ўз эгаларига қайтармасдан фуқароларнинг ҳуқуқларига жуда кўп миқдорда зарар етказган.
Ушбу ҳолат юзасидан 17 март куни Бош прокуратура ҳузуридаги департаментнинг Ангрен шаҳар бўлими томонидан «Авто идеал хизмати» МЧЖ мансабдор шахсларига нисбатан Жиноят кодексининг 192-11-моддаси (Нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) 2-қисми «а» банди билан жиноят иши қўзғатилиб, шаҳар прокуратурасига дастлабки тергов ҳаракатларини олиб бориш учун юборилган.
Жиноят иши бўйича дастлабки тергов ҳаракатлари олиб борилиб, 31 март куни айбланувчи ишни юритишда унинг иштирок этишини истисно этадиган оғир ва давомли касалликка чалингани сабабли Жиноят процессуал кодексининг 364-моддаси 1-қисми 4-банди билан ҳаракатдан тўхтатилган.
Жиноят иши шу йил 11 май куни қайта тикланиб, Жиноят кодексининг 168-моддаси (Фирибгарлик) 3-қисми «а» бандига қайта малакаланиб, дастлабки тергов ҳаракатларини давом эттириш учун Ангрен шаҳар ИИБ тергов бўлимига юборилган.
Фуқароларга етказилган зарарни қоплаш бўйича кўрилган чоралар ҳақида маълумот берилмаган.
Эслатиб ўтамиз, қарийб 19 минг фуқаро автомашина олиш учун «Авто 60 ой» МЧЖга пул бериб алданиб қолган эди. Мазкур компания раҳбари томонидан фуқароларга етказилган моддий зарар ҳажми 57 миллиард сўмга тенг бўлган.
Изоҳ (0)