Prezident Shavkat Mirziyoyev Sardoba suv omborida yuz bergan avariyadan so‘ng 1-may kuni zudlik bilan Sirdaryo viloyatiga safar qilib, Oqoltin tumanida aholi vakillari bilan uchrashdi. Muloqotda davlat rahbari 2020-yil og‘ir kelganini ta’kidladi, deya xabar bermoqda “O‘zbekiston 24”.

“Eng katta narsa — o‘zlaringni qo‘lga olishlaring kerak. Bu endi hech kim kutmagan, birov taxmin qilmagan falakot. 2020-yil og‘ir keldi. Pandemiya bir balo bo‘ldi. Mana shu og‘irlikni yelkamizga olib, chidashimiz kerak. Sabr bilan. Hozir xato qilishga haqimiz yo‘q”, — dedi Prezident.

“Odamlarni vahimaga tushirmasligimiz kerak. Ayniqsa, ayollarni, yoshlarni tinchlantirish zarur. Birorta xonadon, birorta aholi e’tiborsiz qolmaydi. Sizlar bilan bamaslahat joyini ham, sharoitini ham qilib beramiz. Qurilishlarni boshlaymiz”, — dedi Shavkat Mirziyoyev.