Австралия ва Европа Иттифоқининг янги турдаги коронавирус инфекцияси тарқалиши сабабларини мустақил равишда тафтиш қилиш бўйича ташаббусларини 60 дан ортиқ мамлакат қўллаб-қувватлади. Бу ҳақда Австралиянинг АBC телерадиокорпорацияси хабар қилган.
Австралиянинг коронавирус пандемияси сабабларини ўрганиш бўйича ташаббуси аввал Пекин томонидан кескин танқидга учраган, бироқ ушбу ғояни халқаро тарзда қўллаб-қувватлаш кўрсаткичи тезкор тарзда ўсиб бормоқда.
Австралия ва Европа Иттифоқи мамлакатлари ҳар томонлама пухта, мустақил ва холис текширув ўтказиш ва ЖССТнинг COVID-19’га қарши тавсиялари асосида келишув имзолаб, ҳамкорлик қилишга тайёр. Ҳужжатда Хитой ёки касалликнинг энг биринчи ўчоғи Ухань шаҳри ҳақида аниқ маълумот берилмаган.
«Австралия ва яна бир нечта мамлакат Европа Иттифоқи раҳбарлигидаги резолюцияга ҳаммуаллифлик қилди ва унда ҳар томонлама пухта, мустақил ва холис текширув ўтказиш кўзда тутилган», – дейди Австралия ташқи ишлар вазири Марис Пэйн.
Вазирнинг айтишича, бунда асосий урғу пандемияни мустақил равишда ўрганиш ва глобал тарзда инсонлар саломатлигини ҳимоя қилишда тўғри хулосалар чиқаришга берилади.
Телерадиокорпорация маълумотларига асосан ташаббусни 62 та мамлакат, жумладан, Россия, Япония, Буюк Британия, Жанубий Корея, Туркия, Индонезия, ва ЖАР каби давлатлар қўллаб-қувватлаган. Ушбу ташаббусга АҚШ ҳамда Хитой томонидан ҳали муносабат билдирилмаган.«Европа Иттифоқи ва Австралия дипломатлари 17 май куни икки катта давлат АҚШ ҳамда Хитойни бу борада кўмакчи бўлишга кўндириш устида иш олиб борган», – дейилади АBC хабарида.
Мавзуга доир:
- Ғарб разведкаларининг Хитой коронавирусни қасддан тарқатгани ҳақидаги айблови ростми?
- ЖССТ коронавируснинг дастлаб Ухандаги денгиз маҳсулотлари бозорида пайдо бўлганига аниқ далиллар йўқлигини маълум қилди
- АҚШ ҳукумати махсус хизмат вакилларини Ухандаги лабораториянинг COVID-19’га алоқадорлиги бўйича далиллар излашга мажбурламоқда
Изоҳ (0)