Россияда коронавирус сабабли оғир вазиятга тушиб қолган ўзбекистонликлар Москва элчихонаси томонидан «Меҳр» лойиҳаси доирасида ёрдам пулларини олишни бошлади. Бу ҳақда элчихона матбуот хизмати хабар берди.
Лойиҳа 14 майдан бошланган эди. Шу вақт давомида 202 нафар ўзбекистонлик 1 миллион 220 минг 960 рубль миқдорида молиявий ёрдам олди. Маблағлар ёрдам сўраб мурожаат қилган фуқароларнинг шахсий банк карталарига ўтказиб берилган.
Улар орасида:
- Россия олий ўқув юртлари кундузги бўлимида таълим олаётган 190 та талаба;
- COVID-19 коронавирус инфекцияси тасдиқланган 8 нафар ўзбекистонлик;
- 2 та ногирон фуқаро;
- 1 та қарамоғида 2 ёшгача фарзанди бор аёл;
- 1 та ҳомиласи 7 ойдан ошган аёл бор.
Молиявий ёрдамни олиш учун элчихона томонидан махсус ишга туширилган ўзбек ва рус тилларидаги «мехр.рф» портали орқали мурожаат юбориш лозим.
Элчихона матбуот хизматининг қайд этишича, ушбу портал очилгандан сўнг ўтган икки кун ичида Россиянинг деярли барча нуқталаридаги фуқаролардан 12 мингдан ортиқ мурожаатлар келиб тушган. Бироқ келиб тушаётган баъзи мурожаатлар белгиланган мезонларга тўғри келмаслиги аниқланмоқда. Шу сабабли, элчихона томонидан «Меҳр» лойиҳаси мезонларига мувофиқ келмайдиган эҳтиёжманд фуқароларга бошқа механизмлар орқали кўмак бериш учун чора-тадбирлар амалга оширилмоқда.
Эслатиб ўтамиз, Россиядаги ўзбекистонликларни ватанга қайтариш учун 11—24 май кунлари Москва, Қозон, Санкт-Петербург, Ростов-Дон ва Новосибирск шаҳарларидан Тошкентга чартер рейслар амалга оширилади. Чартер рейсларда энг аввал беморлар, ҳомиладор аёллар, кексалар ва ёш болалилар олиб келинади. Мазкур рейсларга чиқиш учун рўйхатдан ўтиш керак.
Изоҳ (0)