Вазирлар Маҳкамасининг «Хоразм вилояти Ҳазорасп туманини 2020—2022 йилларда комплекс ижтимоий-иқтисодий ривожлантириш чора-тадбирлари тўғрисида»ги қарори лойиҳаси жамоатчилик муҳокамаси учун эълон қилинди.
Қайд этилишича, Хоразм вилояти ҳокимлиги, Ўзбекистон Иқтисодий тараққиёт ва камбағалликни қисқартириш вазирлиги, Инвестициялар ва ташқи савдо вазирлиги, Молия вазирлиги ҳамда бошқа давлат ва хўжалик бошқаруви органлари, хўжалик бирлашмалари ва тижорат банклари билан биргаликда «Хоразм вилояти Ҳазорасп туманини 2020—2022 йилларда комплекс ижтимоий-иқтисодий ривожлантириш чора-тадбирлари дастури» ишлаб чиқилган.
Дастурнинг асосий йўналишлари этиб қуйидагилар белгиланади:
- Ҳазорасп туманини ижтимоий-иқтисодий ривожлантириш, аҳолини иш билан таъминланиш даражаси ва фаровонлигини ошириш;
- Ҳазорасп туманида барча хизматларни ўз ичига олган замонавий логистика марказини ташкил этиш;
- ҳудудни ижтимоий-иқтисодий жиҳатдан янада ривожлантириш, аҳолининг, хусусан, ёшлар бандлигини таъминлаш мақсадида ишлаб чиқариш ва хизмат кўрсатиш корхоналарини ишга тушириш;
- ҳудуднинг табиий ва иқлим шароитига хос бўлган чорвачилик ва балиқчилик соҳаларини ривожлантириш;
- йўл-транспорт инфратузилмасини ва телекоммуникация тармоғини ривожлантириш;
- ишлаб чиқариш ва ижтимоий инфратузилмани ривожлантириш, аҳолини ичимлик суви, электр энергияси ва табиий газ билан таъминлаш ҳамда бошқа ижтимоий-маиший хизматлар кўрсатиш даражасини яхшилаш;
- суғориладиган ерларнинг мелиоратив ҳолатини яхшилаш, қишлоқ хўжалиги маҳсулотлари етиштиришни кўпайтириш ва уларни қайта ишлаш даражасини ошириш, шунингдек, хорижий тажриба асосида чорвачиликни ривожлантириш.
Ҳазорасп тумани Саноат қишлоғи, «Саноат» маҳалласида жойлашган Тошкент тиббиёт академияси Урганч филиалига қарашли эски тиббиёт коллежи биноси негизида Ҳиндистон, Россия ҳамда фармацевтика соҳаси ривожланган Европа давлатларининг малакали мутахассисларни жалб қилган ҳолда Тошкент фармацевтика институти Ҳазорасп филиалини ташкил қилиш бўйича таклифига розилик берилади ва бир ой муддатда Тошкент фармацевтика институти Ҳазорасп филиалини ташкил қилиш бўйича ҳукумат қарор лойиҳасини ишлаб чиқиб белгиланган тартибда Вазирлар Маҳкамасига киритади.
Қарор лойиҳаси муҳокамаси 31 майга қадар давом этади. Унинг тўлиқ матни билан қуйида ҳавола орқали танишиш мумкин.
Аввалроқ Фарғона жамоат саломатлиги ва профилактик тиббиёт институти ташкил этилиши ҳақида Президент қарори муҳокама учун эълон қилингани хабар берилган эди.
Шунингдек, Ўзбекистонда тиббиёт коллежлари Ибн Сино номидаги саломатлик техникумларига айлантирилиши, Самарқанд давлат тиббиёт университети ташкил этилиши хабар берилган.
Изоҳ (0)