Жиноят ишлар бўйича Тошкент шаҳар Юнусобод туман судида 2019 йилнинг ёзида бир ўсмирни машинасида босиб кетиб, унинг ўлимига сабабчи бўлган аёл устидан ўтказилган суд иши ўз якунига етди. Автомобилни бошқарган Лариса Толмачёва айбдор деб топилди ва у тўрт йилга озодликдан маҳрум қилинди. Бу ҳақда Олий суд матбуот хизмати раҳбари Азиз Обидовга таяниб, «Gazeta.uz» хабар берди.
Эслатиб ўтамиз, Лариса Толмачёва Nexia-3 автомобилида 2019 йил 4 июнь куни 12 ёшли А.Г., И.С., ва Я.С.нинг устига юриб кетганди. Олинган жароҳатлар натижасида А.Г. воқеа жойида вафот этган, И.С. оёғидан олган жароҳат билан касалхонага ётқизилган. Я.С.га эса амбулатор ёрдам кўрсатилган.
Суд жараёни судья Элза Шамсутдинова раислигида ўтди. Дастабки тергов органи томонидан судланувчи Ўзбекистон Республикаси Жиноят кодексининг 266-моддаси 2-қисмида (Транспорт воситаси ҳаракати ёки хавфсизлиги қоидаларини бузиш) назарда тутилган жиноятни содир этганликда айбланган.
Жиноят иши материалларига кўра, Лариса Толмачёва 2019 йил 4 июнь соат 18:26 да Nexia-3 русумли шахсий автомобилни бошқара туриб, Тошкент шаҳар Юнусобод тумани 11-мавзедаги 5, 6, 7-уйлар ўртасидаги йўлда ҳаракатланган.
Қайд этилишича, транспорт воситаси ҳаракати йўналишини ўнг томонга ўзгартирган Лариса Толмачёва йўл четида турган, 2007 йилда туғилган Г.А., И.С., Я.С. ва 2006 йилда туғилган Ф.Р.ни кўрган. Бироқ Лариса Толмачёва ҳаракатни давом эттириб, Йўл ҳаракати қоидаларини қўпол равишда бузиб, бепарволик сабабли Г. А., И. С., Я. С.нинг устига автомобилда юриб кетган.
Ҳодиса натижасида вояга етмаган Г.А. олинган тан жароҳатларидан вафот этган, жабрланувчи Я.С. енгил тан жароҳатлари олган. Жабрланувчи И.С. эса ўрта даражадаги тан жароҳатлари олган.
Қайд этилишича, суд жараёни давомида судланувчи, гувоҳлар, жабрланувчилар ва уларнинг қонуний вакиллари эшитилган, далиллар ўрганиб чиқилган ва судланувчининг ҳимояси томонидан келтирилган маълумотлар текширилган.
Суд жиноий иш материалларини ҳар томонлама ва тўлиқ ўрганиб чиқиб, Лариса Толмачёвани Ўзбекистон Республикаси Жиноят кодексининг 266-моддаси 2-қисмида Транспорт воситаси ҳаракати ёки хавфсизлиги қоидаларини бузиш) назарда тутилган жиноятни содир этганликда айбдор деб топди. Суднинг 2020 йил 18 майдаги қарори билан Лариса Толмачёвага транспорт воситасини бошқариш ҳуқуқидан уч йилга маҳрум қилган ҳолда тўрт йил муддатга озодликдан маҳрум қилиш жазоси тайинланди. Жазони колонияда ўташ белгиланди ва у 2019 йил 6 июндан бошлаб ҳисобланиши белгиланди.
Жиноят ишлари бўйича Юнусобод туман судининг мазкур қарори устида 10 кун ичида шикоят ёки протест киритиш мумкин, маҳкум ва жабрланувчиларнинг қонуний вакиллари қарор нусхасини олганидан кейин 10 кун ичида жиноий ишлар бўйича Тошкент шаҳар судининг аппеляция инстанциясига, ҳукм қонуний кучга киргач эса жиноий ишлар бўйича Тошкент шаҳар судининг кассация инстанциясига мурожаат қилиши мумкин.
Аввалроқ мазкур воқеа юзасидан олиб борилган тергов жараёнлари ва очиқ ҳолда давом этаётган суд ишининг ёпиқ деб эълон қилингани ҳақида хабарлар берилганди.
Изоҳ (0)