Италия ҳукумати COVID-19 пандемияси сабабли мамлакатда жорий этилган чеклов чораларини енгиллаштириш тўғрисидаги қарорни қабул қилди. Бу ҳақда Meduza хабар берди.
Хусусан, 3 июндан бошлаб мамлакат ичида ҳаракатланиш бўйича чекловлар ҳамда мамлакатга кириш-чиқиш бўйича чекловлар олиб ташланади. Агар эпидемиологик вазият талаб қилса, мамлакат ичида ҳаракатланиш бўйича чекловлар маълум ҳудудлар учун сақланиб қолиши мумкин.
Шунингдек, ҳаракатланишга нисбатан чекловлар ва карантин бўйича талаб коронавирус тасдиқланган шахслар ёки шундай шахслар билан мулоқотда бўлганлар учун сақланиб қолади.
Италия ҳукумати хабарида мамлакатга келганларни карантинга олиш ҳамда мамлакатга қайси давлатлар фуқаролари кириши мумкинлиги масалаларига аниқлик киритилмаган.
Шунингдек, 18 майдан бошлаб Италияда провинциялар ичида ҳаракатланишга қўйилган тақиқ бекор қилинади. Бундан ташқари, Италияда футбол клубларига 18 майдан гуруҳ бўлиб машғулот ўтказишга рухсат берилади.
Сўнгги маълумотларга кўра, Италияда коронавирусга чалинганлар сони 224 минг кишига етган, 31,5 мингдан ортиқ киши касаллик қурбонига айланган.
Изоҳ (0)