Индонезия Соғлиқни сақлаш вазирлиги коронавирус билан боғлиқ вазият фонида янги талабларни жорий этиб, мамлакатга келганларнинг барчасига соғлиғи ҳақида тиббий маълумотнома тақдим этишни мажбурий қилиб қўйди. «РИА Новости»нинг хабар беришича, бу ҳақда Antara агентлиги маълум қилган.
Унда айтилишича, маълумотнома Индонезия фуқароларидан ҳам, бошқа давлатдан келган фуқаролардан ҳам талаб этилади. Бундай маълумотнома фуқаро келаётган мамлакат томонидан берилиши ва инглиз тилида ёзилган бўлиши керак. Уларнинг амал қилиш муддати маълумотнома берилган вақтдан бошлаб 7 кун ҳисобланади.
Бундан ташқари, мамлакатга келганларнинг барчаси карантин муддатини ўташи таъкидланмоқда. Қўшимча тиббий текширувлар ҳам кўзда тутилган.
Индонезия ССВнинг сўнгги маълумотларига кўра, мамлакатда 17 мингдан ортиқ киши коронавирусга чалинган, 1000 дан ортиқ киши вирус қурбони бўлган.
Дунё бўйича эса коронавирус билан касалланганлар сони 4,5 миллиондан ошди.
Изоҳ (0)