Ўзбекистон Энергетика вазирлиги Сардоба сув омборида юзага келган тошқин оқибатлари ва уларни бартараф этиш бўйича амалга оширилаётган ишлар доирасида Сардоба, Оқолтин ва Мирзаобод туманларининг 12 та аҳоли пунктида электр таъминоти тўлиқ тикланганини маълум қилди.
Таъкидланишича, бугунги кунга қадар 3 та подстанция, 92 та трансформатор пункти ва 273 километр электр узатиш тармоқларида (4963 та электр устунлар) таъмирлаш тиклаш ишлари олиб борилиб, тўлиқ ишга туширилган.
Натижада 7987 та электр таъминоти узилган аҳоли хонадонларидан (сув етиб бормаган ҳудудлар аҳолисини хавфсизлик учун электр таъминотидан узиб қўйилганлар билан 12 000 дан ортиқ) 7987 таси ҳам электр энергия билан таъминланди.
«Шунингдек, сув тошқини натижасида 12 та аҳоли пунктида электр ускуналарга талафот етган эди. Бугунги кунда мазкур 12 та аҳоли пункти барқарор электр энергияси билан таъминланди», — дейилади хабарда.
Аввалроқ Сардобадаги фалокатда салкам 6 минг турар жойга зарар етгани, Сирдарёда сув тошқинидан сўнг 7,5 мингдан ортиқ хонадоннинг газ, 10 мингдан ортиқ хонадоннинг электр таъминоти тиклангани, ҳудудда талафот кўрган алоқа объектлари қайта ишга туширилаётгани, тошқинлар оқибатида йўқолган 4 мингдан ортиқ уй ҳайвони ўз эгаларига қайтарилгани ҳақида хабарлар берилган.
Мавзуга доир:
Изоҳ (0)