Тошкентда яна 27 киши коронавирусдан соғайди, улар орасида 4 ёшли бола ҳам бор

Тошкентда 16 май куни 27 нафар бемор тузалиб, реабилитацияга кузатилди, деб хабар бермоқда ССВ матбуот хизмати.

Қайд этилишича, Вирусология илмий-текшириш институти клиникасида 3 нафар, Эпидемиология, микробиология ва юқумли касалликлар илмий-текшириш институти клиникасида 24 нафар коронавирус инфекциясига чалинган бемор бутунлай соғайди.

Вирусология илмий-текшириш институти клиникасидан соғайганларнинг барчаси Тошкент шаҳридан ва коронавирус инфекциясига чалинганлар билан мулоқот орқали касалликни юқтириб олган. Беморлардан 1 нафари эркак, 2 нафари аёл. Улар орасида ёши каттаси 31 ёшда бўлса, энг кичиги 11 ёшда.

Эпидемиология, микробиология ва юқумли касалликлар илмий-текшириш институти клиникасида тузалганларнинг 4 нафари касалликни коронавирус инфекциясига чалинганлар билан мулоқот орқали юқтириб олган. Қолган 20 нафар фуқаро эса чет элдан келган ва карантинга олинган. Коронавирус аниқлангач, клиникага ётқизилган. Улардан 21 нафари эркак, 3 нафари аёл бўлиб, ёши каттаси 60 ёшда бўлса, кичиги 4 ёшда.

Тошкент шаҳрида шу пайтга қадар 682 нафар бемор соғайган бўлса, эндиликда улар 709 нафарга етди.

Шу куннинг ўзида Самарқандда 10 киши коронавирусдан тузалиб, Ўзбекистонда жами соғайганлар сони 2168 нафарга етгани ҳақида хабар берилганди. Эндиликда улар сони 2195 нафарни ташкил этмоқда.

Касалланганларнинг умумий сони эса 16 май соат 16:00 ҳолатига кўра, 2719 нафарга етди.