Самарқандда 34 кишига коронавирус юқтирган тиббиёт ходимига нисбатан жиноят иши қўзғатилгани ҳақида хабар берилганди. Соғлиқни сақлаш вазирлиги Бош прокуратурага мурожаат йўллаб, мазкур қарорнинг бекор қилинишини сўради.
Соғлиқни сақлаш вазирлиги жиноят иши қўзғатиш тўғрисидаги мазкур қарор қуйидаги асосларга кўра бекор қилиниши лозим, деб ҳисоблайди. Биринчидан, Жиноят кодексининг 257-1-моддаси биринчи қисми (Санитарияга оид қонун ҳужжатларини ёки эпидемияга қарши кураш қоидаларини бузиш) диспозициясидаги қасддан содир этилиши талаб этиладиган қилмишлардан бирортаси фуқаро Х.Д. томонидан содир этилмаган. Иккинчидан, Жиноят кодексининг юқоридаги моддаси билан жавобгарликка тортиш учун махсус субъект бўлиш талаб этилмайди. Аниқроғи, бу модда билан фақатгина тиббиёт ходимлари жавобгар қилиниши мумкинлиги ҳам қонунда кўрсатилмаган. Айтмоқчи бўлганимиз, тана ҳарорати ошганлигини била туриб, шифокорга мурожаат этмасдан ўзгага инфекция юқтирганлик учун жавобгарликка тортиш мумкин бўлса, нега унда юзлаб ҳолатларда қонуннинг бундай кучидан фойдаланилмади? Нимага айнан тиббиёт ходимига келганда қонунни бундай талқин қилиш мумкинлиги эсимизга тушиб қолди? Масалан, яқинда самарқандлик жуда катта тадбиркорнинг фарзанди кўпчиликка худди шундай шароитда коронавирус юқтирганлиги ҳақида интернетда маълумотлар тарқалган эди. Нима учун ушбу ҳолатда қонуннинг шу меъёридан фойдаланилмади?Эслатиб ўтамиз, фуқаро Х.Д. доимий мулоқотда бўлган турмуш ўртоғи ва бошқа қариндошлари, ўзи даволаган бемор ва ҳамкасбларидан 11 нафарига, улар орқали яна 23 кишига COVID-19 инфекциясининг юқишига сабаб бўлган.Қолаверса, қонунчилигимизда тана ҳарорати ошган фуқаро хоҳ у тиббиёт ходими бўлсин, хоҳ бошқа коронавирусга анализ топширмаса, жиноий жавобгарликка тортилади, деган мажбурият ҳали ўрнатилгани йўқ.
Юқоридаги ҳолатда тиббиёт ходими ҳисобланган Х.Д. коронавирус инфекциясини жуда катта эҳтимол билан беморларга хизмат кўрсатиш жараёнида юқтириб олган. У коронавирус юқтириб олганлигини 2020 йил 28 апрель куни топширган тести натижалари аниқ бўлганидан кейингина билган ва дарҳол даволаниш учун ётқизилган. Бунгача у ушбу инфекцияни юқтириб олганлигини билмаган ва билиши мумкин ҳам бўлмаган. Қолаверса, 34 нафар фуқарога коронавирус айнан тиббиёт ходимидан юққанми ёки бошқаданлигини ҳали дастлабки тергов жараёнида исботлаш керак бўлади.
Тўғри, Соғлиқни сақлаш вазирлиги Х.Д.нинг ўз соғлиғига нисбатан бепарво бўлиб, кимларнидир хавф остида қолдирганлигини оқламоқчи эмас. Шу билан биргаликда, вазирлик мазкур ҳолатда Х.Д.га нисбатан жиноят иши қўзғатиш тўғрисидаги қарор асоссиз, деб ҳисоблайди. Шундан келиб чиққан ҳолда, соғлиқни сақлаш вазири Алишер Шодмонов бош прокурорга Х.Д.га нисбатан жиноят иши қўзғатиш тўғрисидаги қарорни бекор қилиш масаласини ўз ваколати доирасида кўриб чиқилишини сўраб 2020 йил 14 май куни мурожаат йўллади. Ўйлаймизки, ушбу масала назоратга олиниб, ўз қонуний ечимини топади.
Маълумки, айни кунларда бутун дунёда коронавирус пандемиясига қарши мардонавор курашаётган шифокорлар алоҳида эътироф этилмоқда. Ўз навбатида юртимиз тиббиёт ходимлари ҳам, давлатимиз раҳбари таъбири билан айтганда, ўз ҳаёти ва соғлиғини гаровга қўйиб, пандемияга қарши қаҳрамонона фаолият олиб боришмоқда.
Соғлиқни сақлаш тизими бошқа давлат идоралари билан ҳамкорликда коронавирус пандемиясига қарши қаттиқ курашаётган ана шундай бир шароитда юқоридаги каби дилни хира қиладиган бу каби ҳолатлар олиб борилаётган кенг кўламли саъй-ҳаракатлар самарасига, минглаб шифокорлар кайфиятига фақатгина салбий таъсир кўрсатиши мумкин.
Руслан Муҳаммадиев, Соғлиқни сақлаш вазирлиги юридик бўлими бошлиғи
Ўзбекистонда 15 май соат 10:00 ҳолатига кўра, коронавирус инфекцияси қайд этилганлар сони 2652 нафарни ташкил қилмоқда. Мамлакатда коронавирусдан соғайганларнинг жами сони 2156 нафарга етди.
Изоҳ (0)