Президент Шавкат Мирзиёев 15 май, жума куни Сирдарё вилоятига ташрифи давомида 1 майдаги сув тошқинидан жабр кўрган Мирзаобод ва Оқолтин туманларида ҳам бўлди, дея хабар бермоқда Президент матбуот хизмати.
Мирзаобод туманининг «Навбаҳор» маҳалласи ҳудудида 360 квартирали 9 та кўп қаватли уй барпо этилиши режалаштирилган. Ушбу ишларга Сирдарё, Жиззах, Фарғона, Наманган ва Андижон вилоятлари қурувчилари бириктирилган.
Президент мутасаддилар билан суҳбатда қурилиш-таъмирлаш ишларини сифатли бажариш кераклиги, энергия тежамкор материаллардан фойдаланиш муҳимлигини таъкидлаган.
Шавкат Мирзиёев мирзаободлик нуронийлар, маҳалла фаоллари ва хонадон эгалари билан учрашиб, уй-жойлар ва инфратузилмани тиклаш, электр энергия, газ, ичимлик суви таъминоти ва йўлларни таъмирлаш бўйича зарур чоралар кўрилаётганини айтиб ўтди.
Президент Оқолтин туманида аҳоли вакиллари билан бўлиб ўтган учрашувда туманининг «Ҳақиқат» маҳалласида 800 хонадондан иборат 20 та кўп қаватли уй барпо этилишини таъкидлади.
Туманда 8,7 минг гектар экин майдонларини сув босган. Сардоба ва Мирзаобод туманларидаги каби, бу ерда ҳам кўчма насослар ёрдамида бу сув қочирилди. Асраб қолиш мумкин бўлган ғўзани чопиқ ва культивация қилиш, қолган жойларда бошқа экинлар экиш чоралари кўрилмоқда.
Мирзаободлик ва оқолтинлик жабрдийдаларга ҳам Сардобада бўлгани каби тегишли сертификатлар ва пул маблағли банк карточкалари тарқатилган. Президент Мирзаобод туманида қурилиши режалаштирилган турар жойларнинг пойдеворига тамал тоши қўйган.
Президент шу куннинг ўзида Тошкентга қайтиб келди.
Мавзуга доир:
- Сардобадаги фалокатдан жабрланганлар янги кўп қаватли уйларга ва ўзларининг таъмирланган ҳовлиларига 1 сентябргача кўчиб ўтиши мумкин бўлади
- Сардобадаги фалокатдан жабр кўрган ҳар бир хонадонга Шавкат Мирзиёев номидан 40 млн сўмдан берилди
- Шавкат Мирзиёев Сардобада қуриладиган 37 та «дом»нинг тамал тошини қўйди
Изоҳ (0)