АОКА ҳузуридаги штабда Транспорт вазирлиги матбуот хизмати раҳбари Наврўз Ашурматов иштирокида брифинг ўтказилиб, Республика махсус комиссияси томонидан тасдиқланган карантин даврида маҳаллий йўналишларда авиа ва темир йўл қатновларини йўлга қўйишнинг вақтинчалик тартиби ҳақида маълумот берилди.
Мазкур тартибга мувофиқ, авиа ва темир йўл рейсларига чиқиш истагида бўлган йўловчилар коронавирус инфекциясига тест топшириши лозим. Бунда Санитария-эпидемиологик осойишталик маркази томонидан коронавирус инфекциясига тест таҳлиллари олинганига 120 соатдан кўп бўлмаган ва таҳлил натижаси манфий экани ҳақидаги маълумотномага эга бўлган йўловчилар рейсларга қўйилади.
Барча йўловчиларнинг аэропорт ва темир йўл вокзаллари ҳудудига киришидан олдин тана ҳарорати ўлчанади.
- Тана ҳарорати 37 даражадан юқори бўлмаган йўловчилар дезинфектор ёрдамида зарарсизлантирилади ҳамда ҳаво ва темир йўл транспортларига бир марталик ҳимоя ниқоблари ва қўлқопларда киритилади;
- Тана ҳарорати 37 даражадан юқори бўлган йўловчиларга авиа ва темир йўл хизматларидан фойдаланишга рухсат берилмайди. Бундай ҳолатларда йўловчига чипта пули белгиланган тартибда қайтариб берилади.
Аэропорт ва темир йўл вокзалларида умумий овқатланиш, хизмат кўрсатиш ва савдо шохобчаларининг фаолият юритишига йўл қўйилмайди.
Йўловчилар савдо автоматларидан фойдаланишлари мумкин.
Йўловчилар ҳаво кемаларига ва темир йўл вагонларига ижтимоий масофани сақлаган ҳолда жойлаштирилади.
Авиа ва темир йўл қатновларига электрон чипталар онлайн тарзда сотилади.
Шунингдек, қатнов вақтида қуйидаги тартибга амал қилинади:
- йўловчилар қатнов вақтида самолёт салонида ва вагонлар бўйлаб ҳаракатланиши тақиқланади (ҳожатхонадан фойдаланиш ҳолатлари бундан мустасно);
- парвоз вақтида йўловчиларга фақатгина 250 мл ҳажмдаги қадоқланган ичимлик сувлари берилади — озиқ-овқат маҳсулотлари, турли хил журнал ва газеталар тарқатилмайди (авария ҳолатидаги ҳаракат йўриқномаси бундан мустасно);
- поезд вагонларида йўловчиларга берилган бир марталик ҳимоя ниқоблари ва қўлқопларини ечишга рухсат берилмайди (йўловчиларнинг сув ичиш ҳолатлари бундан мустасно);
- вагонларнинг ҳожатхона ҳамда тамбурларида йўловчиларнинг тўпланишларига йўл қўйилмайди;
- Йўловчилар учун ҳожатхоналар санитария ва гигиена воситалари, антисептик воситалар билан тўлиқ таъминланади.
Мазкур вақтинчалик тартиб талаблари бузилишида айбдор бўлган шахслар эпидемияларга қарши кураш қоидаларини бузганлик учун маъмурий жавобгарликка тортилади.
Эслатиб ўтамиз, Республика махсус комиссиясининг 2020 йил 14 майдаги қарори билан Ўзбекистонда карантин 1 июнгача узайтирилди, бироқ темир йўл ва авиақатновлар қисман қайта тикланади.
Изоҳ (0)