Eset компанияси Ўзбекистонда янги Android Trojan Spy троян вируси борлиги ва ушбу зарарли дастурни тарқатишда COVID-19 мавзусидан фойдаланилганини хабар қилди. Бу ҳақда Ўзбекистон Ахборотлаштириш ва телекоммуникациялар соҳасида назорат бўйича давлат инспекцияси «Ўзкомназорат» маълум қилди.
«Ўзкомназорат» хабарига кўра, илова коронавирус эпидемияси ҳақида статистик маълумотларни харитада намойиш қилади, бироқ бир вақтнинг ўзида мобил қурилмада суратга олиши, галереядан фотоларни ўғирлаши, қурилмадаги контактлар рўйхати, SMS хабарномалар ва телефондаги барча бошқа иловалар бошқаруви учун жиноятчиларга шароит яратиши мумкин.
Аввалроқ давлат инспекцияси мобил иловаларни юклаш ва ўрнатишда дастурнинг қайси операцияларни амалга оширишга рухсат сўраётганига эътибор бериш, агар бу каби рухсатлар сони асоссиз равишда кўп бўлса бундай турдаги программаларни ишлатишдан воз кечишни тавсия қилган.
«Ўзкомназорат» интернет фойдаланувчиларидан шу ва шунга ўхшаш бошқа иловаларни юклаб олиш, ўрнатишда ҳушёр бўлишни, коронавирус ҳақидаги маълумотларни расмий ҳамда ишончли манбалардан олиш лозимлигини эслатиб ўтди.
Аввалроқ коронавирус сабабли интернет тармоғида фирибгарликлар кўпайгани ҳамда фуқароларга карантин қоидаларини бузганлиги ҳақида SMS жўнатиб, пул ундирмоқчи бўлаётган фирибгарлар пайдо бўлгани маълум қилинганди. Шунингдек, фирибгарлар пенсия ва нафақаларнинг пластик картага ўтказилишидан фойдаланиши мумкинлиги айтилганди.
Изоҳ (0)