Хоразм вилоятининг Янгибозор туманида 12 май куни юз берган ЙТҲ оқибатида 4 ёшли бола вафот этди. Бу ҳақда ЙҲХББ хабар берди.
Ҳодиса Қаландўрман қишлоғи ҳудудидан ўтган ички 4К-928 автомобиль йўлининг 3-километрида юз берган. 1998 йилда туғилган А.С. Matiz автомобили тезлигини меъёридан оширган ҳолда бошқарган. Йўл четида ҳаракатланиб кетаётган 2016 йилда туғилган М.Ж. 2008 йилда туғилган З.Ў.нинг қўлидан чиқиб кетиб, йўлга югуриб чиққан вақтда уни Matiz уриб юборган.
ЙҲХББ томонидан эълон қилинган суратларда Matiz’нинг тормоз изи бир неча ўн метрга чўзилиб кетганини кўриш мумкин.
4 ёшли М.Ж. олган тан жароҳатлари оғирлиги сабабли шифохонада вафот этган.
Мазкур ҳолат юзасидан Янгибозор тумани ИИБ Тергов гуруҳи томонидан суриштирув ишлари олиб борилмоқда.
Жорий ҳафта мобайнида Ўзбекистонда бир нечта одам ўлими билан боғлиқ ЙТҲлар қайд этилди. 11 май куни Сурхондарёнинг Шўрчи туманида Lacetti мотороллерга урилиши оқибатида 38 ёшли мотороллер ҳайдовчиси, Тошкент вилоятининг Чиноз туманида Isuzu автобуси велосипедчини уриб юбориши оқибатида 33 ёшли велосипедчи, 12 май куни Бухоронинг Ромитан туманида трактор тиркамаси ағдарилиб кетиши оқибатида 33, 34 ва 38 ёшли аёллар вафот этди.
Изоҳ (0)